16 jeltoqsan – qazaqtyń áıgili opera ánshisi, Qazaqstannyń halyq ártisi Bıbigúl Tólegenovanyń týǵan kúnine oraı, Dımash Qudaıbergen óz áleýmettik jelisinde ánshige arnap júrekjardy jazba jarıalady, dep habarlaıdy aqshamnews.kz
Dımash óziniń jazbasynda Bıbigúl Ahmetqyzynyń tereń ári áserli daýysy tek Qazaqstanda ǵana emes, shetelde de kórermenderdiń júregin jaýlaǵanyn atap ótti. Ol qazaq mýzyka mádenıetine degen súıispenshiligin jastarǵa jetkizip, qanshama býyndy shabyttandyryp kele jatqan Bıbigúl apaıynyń ulaǵatty ustazdyq eńbegin erekshe qurmetteıtinin jetkizdi.
– Qurmetti Bıbigúl Ahmetqyzy! Kúni keshe alǵan marapatymdy sizdiń 95 jyldyq mereıtoıyńyzdyń qarsańynda sizge arnaýǵa ruqsat etińiz. Sizdiń ónerińizden nár alyp, bala kezimnen sýsyndap óstim. Analyq qamqorlyǵyńyz ben ustazdyq ósıetińiz maǵan úlken shabyt berip, osy kúnge deıin jetken jetistikterimniń negizi boldy.
Sondaı-aq, Dımash óz jazbasynda #dears jankúıerlerine jáne barsha jerlesterine shyn júrekten alǵys bildirip:
– Elimiz aman, jurtymyz tynysh bolsyn! – degen izgi tilegin joldady.
Bıbigúl Ahmetqyzynyń 95 jyldyq mereıtoıy – qazaq óneri úshin erekshe mereke!