Álıhan Smaıylov IV Azıa Para oıyndarynyń jeńimpazdary jáne júldegerlerimen kezdesti
QR Premer-Mınıstri Álıhan Smaıylov 22-28 qazan aralyǵynda Qytaıdyń Hanchjoý qalasynda ótken IV Azıa Para oıyndarynyń jeńimpazdarymen jáne júldegerlerimen kezdesti.
Jarysta Qazaqstan atynan para paýerlıftıng, bochcha, para jeńil atletıka, para velosport, akademıalyq eskek esý, para dzúdo, otyryp oınaıtyn voleıbol, para ústel tenısi, shahmat, para oq atý, para sadaq atý, para taekvondo, para júzý jáne para kanoe sıaqty 14 sport túrinen 131 sportshy qatysty. Nátıjesinde el quramasy 41 medal jeńip aldy, onyń ishinde 8 altyn, 12 kúmis jáne 21 qola medal ıelendi. Medal sany boıynsha Qazaqstan 44 qatysýshy el arasynda 11-shi orynǵa kóterildi.
Kezdesý barysynda Álıhan Smaıylov Memleket basshysy Qasym-Jomart Toqaevtyń alǵys hatyn oqyp, qazaqstandyq paralımpıada oıynshylaryn ótken Para oıyndaryndaǵy jarqyn jeńisterimen quttyqtady.
«Sizderdiń boılaryńyzdaǵy janqıarlyq rýh pen jeńiske degen qushtarlyq mıllıondaǵan adamdardy ómirdegi qıyndyqtardy eńserýge jáne tabysqa jeteleıdi. Sizderdiń keremet sporttyq ónerlerińiz adamnyń erik-jigeriniń sheksiz ekenin pash etti. Sizderdiń árqaısylaryńyzdyń ómir joldaryńyz – óskeleń urpaq úshin sheberliktiń, batyldyqtyń, sondaı-aq tabandylyqtyń úlgisi. Onsyz, árıne joǵary sporttyq nátıjelerge qol jetkizý múmkin emes», — dedi Premer-Mınıstr.
Álıhan Smaıylovtyń aıtýynsha, jetistikke jetý jolynda paralımpıadashylarǵa qoldaý kórsetken tálimgerler men jattyqtyrýshylar da erekshe qurmetke laıyq.
«Sizder tabysqa jetý jolynda talmaı kúrestińizder. Azıa Para oıyndaryndaǵy búgingi jeńister — bolashaq Paralımpıada jetistikteri úshin mańyzdy qadam», — dedi ol.
Úkimet basshysymen kezdesýge qurlyqtyq jarystardyń jeńimpazdary Davıd Degtárev (para paýerlıftıng), Nurdáýlet Jumaǵalı jáne Dıas Kenjebek (para júzý), Aqmaral Naýatbek, Erǵalı Shameı jáne Oljas Orazalyuly (para dzúdo), Dastan Muqashbekov (jeńil atletıka) qatysty.
Azıa rekordshysy Nurdáýlet Jumaǵalı mundaı iri jarys alańynda óner kórsetý árqashan úlken jaýapkershilik júkteıtinin atap ótti.
«Jattyǵý barysynda biz barlyq tapsyrmalardy buljytpaı oryndadyq. Jarys aldynda daıyndyǵymyz joǵary deńgeıde ótti. Azıa Para oıyndarynda búkil qazaq eliniń qoldaýyn erekshe sezindim. Barlyq sportshylardyń atynan, Qazaqstan halqyna zor alǵysymdy bildiremin. Aldaǵy Paralımpıada oıyndarynda elimizdiń ánuranyn shyrqyratýǵa bar kúshimizdi salamyz», — dedi ol.
Para dzúdoshy Aqmaral Naýatbek Azıa Para oıyndary qazaqstandyq sportshylar úshin Paralımpıada aldyndaǵy úlken synaq bolǵanyn atap ótti.
«Bizdiń jetistigimiz – barlyq jattyqtyrýshylar men medısına qyzmetkerleriniń birlesken eńbeginiń nátıjesi. Barlyq sportshylardyń atynan aldaǵy Paralımpıada oıyndaryna tyńǵylyqty daıyndalyp, elimizdi jaqsy jetistiktermen qýantamyz dep tolyq senimmen aıtamyn», — dedi ol.
Kezdesý barysynda Álıhan Smaıylov Azıa Para oıyndarynyń jeńimpazdary men júldegerlerine, sondaı-aq olardy daıyndaǵan jattyqtyrýshylarǵa Memleket basshysynyń atynan alǵys hattar men estelik syılyqtaryn tabys etti. Qazaqstannyń Paralımpıadalyq dzúdo federasıasy da Prezıdenttiń alǵys hatymen marapattaldy.