Búgin Taıland astanasy Bangkokta sadaq atýdan Azıa chempıonaty óz máresine jetti.
Sary qurlyq birinshiligindegi olımpıadalyq sadaq atýdan Qazaqstan erler quramasy kúmis júldeger atanyp, Parıj Olımpıadasynyń lısenzıasyna qol jetkizdi, dep habarlaıdy almaty-akshamy.kz. Bangkoktaǵy básekede ulttyq qurama sapynda Ilfat Abdýllın, Dáýletkeldi Jańbyrbaı men Aleksandr Eremenko synǵa tústi. Jarystyń bas júldesin Ońtústik Koreıa sportshylary ıelense, qola medal ındonezıalyqtarǵa buıyrdy. Ulttyq qurama fınalǵa jeter jolda Japonıa, Úndistan jáne Qytaıdyń Taıbeı quramasynan basym tústi.
«Jaqynda ǵana sadaq atý federasıasynyń ókilderimen kezdesken edim. Azıa oıyndarynda sátsiz óner kórsetkenine qaramastan, ulttyq qurama sportshylary joldama jolyndaǵy jarystyń birinshi múmkindiginde Olımpıada lısenzıasyn jeńip aldy. Hanchjoýdaǵy osy jyldyń basty dodasynan keıin komanda ókilderi qysqa merzimde qateliktermen jumys istep, Parıjge joldama jeńip alyp otyr. Endi sportshylar Olımpıada oıyndaryna daıyndyqty kúsheıtý kerek», - dedi týrızm jáne sport mınıstri Ermek Marjyqpaev.
Qazaqstan byltyr Olımpıa oıyndaryna irikteý júıesi jańartylǵan soń, joldamaǵa ıelik etken alǵashqy el atandy. Sebebi, qurlyq chempıony atanǵan Ońtústik Koreıa sportshylary buǵan deıin Hanchjoýdaǵy Azıa oıyndarynda Olımpıada joldamasyn jeńip alǵan edi. Aıta keteıik, qazaqstandyq mergender 1996 jyldan beri tórt jyldyqtyń basty básekesinen syrt qalǵan emes. Al 2021 jylǵy Tokıo Olımpıadasynda erler quramasy tolyq quramda baq synady. Sondaı-aq Azıa birinshiliginiń quralmaly sadaqpen (Compound bow) nysana kózdeý saıysynda Ulttyq qurama sportshysy Andreı Tútún altynnan alqa taqty. Odan keıingi tuǵyr satysyna Djýn Ho Kım (Ońtústik Koreıa) men Abhıshek Vermadan (Úndistan) kóterildi. Osy baǵdarlamada Qazaqstan erler quramasy Ońtústik Koreıadan keıingi nátıjeni kórsetip, kúmis júldege ıe bolsa, úzdik úshtikti Úndistan túıindedi. Ókinishke qaraı, sadaq atýdyń blok sadaq baǵdarlamasy Olımpıada baǵdarlamasyna enbegen. Osylaısha, Taılandta ótken bıylǵy sary qurlyq chempıonatyn ulttyq qurama sportshylary 3 júldemen qorytyndylady.