búginde iri munaı kompanıasynyń ınjeneri
Maqpal esimdi qazaq qyzy Qyrǵyzstanda, shaǵyn qalashyqta týǵan. Otbasynyń kedeı turǵanyn aıtady. Tipti, keıde maıǵa pıaz qýyryp, ony nanmen jegen kúnderi de bolǵanyn jasyrmaıdy. Al búginde AQSH-tyń iri ConocoPhillips munaı kompanıasynyń ınjeneri bolyp eńbek etip júr.
Segiz jasynan bastap ata-anasyna, sharýashylyqa kómektese bastaıdy. Bul otbasy jıǵan-tergen aqshasyna eki sıyr satyp alyp, kishkentaı Maqpal da sıyr saýýdy úırenip, tipti, ájesimen birge súzbe de daıyndaıdy. Keıinirek bazarǵa ata-anasyna ilesip kelip, saýda jasaýǵa kómektese bastaıdy.
Maqpal buǵanasy bekimeı jatyp, úıdiń qyrýar sharýasyn atqara júrip, aldyna «mektepti aıaqtap, joǵary oqý ornyna túsýim kerek, qalaıda birinshi bolamyn» degen maqsat qoıady. Aǵylshyn tiline de sol bala shaǵynan qyzyǵa bastaǵan. Sóıtip, kitap satyp alýǵa óz betinshe aqsha jınaı bastaıdy. Shyny bótelkeler jınap, odan túsken bolmashy tıyndaryn asqan tózimdilikpen jınaı bergen. Kitaptyń quny 200 som bolatyn. Aqyry sol qarajatty jınap, armanyndaǵy til úıretetin kitabyn satyp alady.
Onyń otbasynda Qazaqstanǵa – atamekenge kóshý týraly únemi áńgime bolatyn. Sebebi, olar joǵary bilim alý úshin kóbirek múmkindikter Qazaqstanda bar dep esepteıtin. Biraq bir úıli jannyń atajurtqa kóship kelýine materıaldyq jaǵdaıy kótermeıtin bolǵan soń, 15 jastaǵy Maqpal bir ózi keledi bilim qýyp. Onda da Qyrǵyzstanmen shekaralas jatqan Qordaı aýdanyna taban tireıdi. Bilimge qushtar ójet qyz óz betinshe páter jaldap turyp, jergilikti mektepte orta bilimin jalǵastyrady. Ár senbi, jeksenbide ata-anasyna kómektesý úshin Qyrǵyzstanǵa qaıtatyn. Ol sonda da tek «bestik» degen baǵamen oqyǵan. Túrli pándik olımpıadalarǵa qatysqan. Ásirese, aǵylshyn jáne matematıkany jaqsy kórdi. Mektepti úzdik bitirdi.
Birde Maqpal anasyna bir qurbysynyń AQSH ýnıversıtetinde oqyǵan uly týraly maqtanyshpen aıtyp otyrǵanyn estip qalady. Bala kúninen aǵylshyn tiline yntyq qyzǵa anasy birden qoldaý kórsetedi. Qoldaý bolǵanda da, amerıkandyq bilim berý vızasyn alý úshin birneshe nesıe alady. Sóıtip, Maqpal Tehas shtatyndaǵy eń úlken qala – Hústonǵa jol tartady. Senemiz be, onyń qolynda noýtbýk turmaq, eshqashan uıaly telefon da bolǵan emes. Tek ushý bıleti jáne jol sómkesi ǵana bolǵan edi. Tildi de jetik bilmeıtin.
Shamamen bir jyldan keıin til úırenip, aqsha jınap alǵannan keıin, qyz Húston qoǵamdyq kolejine oqýǵa túsedi. Onda eki baǵyt boıynsha bilim aldy: Business jáne Associate of science. 2016 jyly kolejdi úzdik bitiredi. Sol jyly ol Húston ýnıversıtetine bıznes baǵytynda oqýǵa túsedi. Biraz ýaqyttan keıin ol Tehasta óte damyǵan munaı-gaz salasyna qyzyǵýshylyq tanytady. Sol jyldyń kúzinde onyń ýnıversıtetinde áleýetti jumys berýshiler úshin «Ashyq esik» kúni ótken bolatyn. Maqpaldyń juldyzy janǵan kún ol. Búginde ol ConocoPhillips iri munaı kompanıasynda kishi ınjener bolyp eńbek etip júr.
Ázirlegen Nurjamal ÁLİSHEVA.