óziniń emine adal eńbegimen qarajat jınap júr
Almatydaǵy «Altyn orda» bazarynyń aldynda qolarbada otyryp án salatyn súıkimdi boıjetkendi bárimiz de áleýmettik medıa arqyly bilemiz. Onyń aty-jóni – Aqerke Súleıman. 17 jasta. Almaty irgesindegi Qyrǵaýyldy aýylynda turady. Megapolıs kolejderiniń birinde onlaın bilim alyp júr.
Ótkende anasy ekeýi «Tańsholpan» baǵdarlamasyna da kelgen bolatyn. Bes aǵaıyndy Aqerke – egizdiń syńary. Ol kórermenderine qyzym aıaǵynan turyp ketse eken dep, jarǵaq qulaǵy jastyqqa tımeı, tynym tappaı júrgen anasynyń eshqashan muńaımaǵanyn, únemi qýanyp júrgenin qalaıtynyn jetkizdi. Al anasy qyzynyń bala kúninen ónerge, ánge qumar ekenin, ár qadamyn qoldaıtynyn aıtty.
Anasynyń aıtýynsha, Aqerkege kishkentaı kúninde ota jasalyp, bir qoly istemeı qalǵan. Eseıe kele qolarbaǵa tańylǵan. Al Túrkıa eliniń dárigerleri qyzdy aıaǵynan turǵyzamyz dep bekinip otyrǵan kórinedi. Biraq oǵan 15 mln teńge qarajat kerek.
Án salýǵa qumar Aqerke «Altyn orda» bazary aldynda án salatyn Ádilet degen jigitti «TıkTok» arqyly kórip, ónerine tánti bolyp júrgen bolatyn. Birde sol mańda anasymen kele jatyp, batyldyq tanytyp, Ádilettiń janyna barady. Jigit ózine qolarbamen taıap kelgen beıtanys qaryndasty esh tosyrqamaı, betinen súıip, meıirimmen qarsy alady. Sodan beri Ádilet te ánshi qyzymyzǵa qoldaý kórsetip keledi.
Iá, 17 jastaǵy qyz óleń aıtyp, bazar aldynan ótetin júrginshilerdi ánge bólep, jaqsy kóńil-kúı syılap, adal eńbegimen óziniń emine qarajat jınap júr. Aqerke Súleıman keıingi eki aıda otaǵa qajetti 15 mıllıon teńgeniń 11 mıllıonnan astamyn tapqan.
Búginde otaǵa qajetti qarajat jınalyp ta qoıar ma edi, eger orta joldan kılikken alaıaqtar bolmasa. Iá, áldebir belgisiz adamdar Aqerkeniń sýreti men beınejazbalaryn paıdalanyp, áleýmettik jelilerden feık-paraqshalar ashyp, óz esepshottaryna aqsha jınap júrgen kórinedi. Tipti, bir feık-paraqshada «Aqerkeniń otbasy qajetti apparatty satyp alyp, qyz aıaǵynan turyp ketti» degen aqparat taraǵan. Al ómirge qushtar qaısar qyz «Altyn orda» bazarynda án salyp otyr. Emine qajetti qalǵan qarajatty jınaýǵa áli de úmitti.
Ázirlegen Nurjamal ÁLİSHEVA.