Investısıalyq belsendilik, alys-beris kólemin arttyryp, eksportqa basymdyq berý
Buǵan qosa qyzmet kórsetý salasyn jetildirý jáne naqty sektordaǵy turaqty ósim qarqynyn qamtamasyz etý, dep habarlaıdy Almaty-akshamy.kz
Dál osy qadamdar bıyl otandyq ekonomıkanyń qaryshtap damýyna negiz boldy.
«Bul oraıda aqparat jáne baılanys, saýda, sý jáne elektrmen jabdyqtaý, qurylys jáne óńdeý ónerkásibi salalarynyń úlesi basym», - deıdi sarapshylar.
Syrttan qarjy tartýdyń kózderi artyp, osy baǵyttaǵy áleýetti barynsha kádege jaratý da el aýqatyn asyrýǵa sep bolǵan. Qarjyny tıimdi quıatyn baǵyt ta jetip artylady. Oǵan úzdik ınvestorlar kóshinde keletin aspanasty eli kýá.
«Búgingi tańda Qytaı – Qazaqstannyń negizgi saýda-ekonomıkalyq seriktesteriniń biri. Aspanasty eli ekonomıkamyzǵa eń kóp qarjy quıatyn memleketterdiń bestigine kiredi. 2020 jyly taraptardyń ózara taýar aınalymynyń kólemi jahandyq pandemıaǵa qaramastan 4% artyp, 15 mlrd AQSH dollarynan asty», - dedi QR SİM Investısıalar jónindegi komıtet tóraǵasynyń orynbasary Erlan Zeıneshev.
Aǵymdaǵy jyly qurylys salasyna salynǵan ınvestısıa kólemi artqanyn da aıtý kerek. Ósim eki eseden asqan.
Bul oraıda qarjy tartý óńdeý ónerkásibinde – 50,5%, al aýyl sharýashylyǵynda – 40,5% jáne saýdada 35% ulǵaıǵan.
«Qazir bizde saýda balansy nyǵaıdy. Jalpy alǵanda 14,1% ósip, 82,2 mlrd dollardy qurady. Bizde eksporttyń joǵary ósimi baıqalady. Otandyq ónimdi tasymaldaý 23,5% artyp, 49,1 mlrd dollardy qurady. Onyń ishinde óńdelgen taýarlardyń eksporty basym. Bizde bul baǵyt qarqyn alyp jatqanyn erekshe atap ótken jón. Iaǵnı óńdelgen taýarlar eksporty 24,4% ósip, 15,5 mlrd dollardy qurady», - dedi QR UEM Makroekonomıkalyq taldaý jáne boljamdaý departamenti basqarmasynyń basshysy Qalybek Maǵzum.
Sarapshylardyń esebinshe, 2021 jyly turaqty ósý úrdisin óńdeý ónerkásibi kórsetken. Osy jyldyń 10 aıynda óndiris kólemi 5,2% artqan. Ósýdiń oń serpini barlyq óńirlerde baıqalady.
Osy rette Almaty qalasy, Almaty jáne Qyzylorda oblystary kósh bastap tur.