Beseýiniń tórteýi ózennen ótip úlgergen, al bireýi qalyp ketken
QR Syrtqy ister mınıstrliginiń resmı ókili Aıbek Smadıarov Mánma men Taılandtyń arasynda ornalasqan "Altyn úshburysh" degen aýmaqta Qazaqstan azamattary jumys quldyǵyna túsip, qashýǵa májbúr bolǵanyn aıtty, dep habarlaıdy Almaty-akshamy.kz Zakon.kz-ke silteme jasap.
Syrtqy ister mınıstrliginiń habarlaýynsha, Mánmada quldyqtan qashqan qazaq jigitin elge qaıtarý úshin kelissóz júrgizilip jatyr.
"Osyǵan deıin qansha ret eskertý aıtyp, aqparat taratsaq ta, qazaqstandyqtar sol jaqqa baryp jatyr. Keıingi aqparat boıynsha ol jaqtan 5 Qazaqstan azamaty anyqtaldy", - dedi Aıbek Smadıarov SİM-de ótken brıfıńte.
Aıbek Smadıarovtyń túsindirýinshe, bıyl sáýirde bir adam Qazaqstannyń Taılandtaǵy konsýlyna habarlasyp, 5 qazaqstandyqtyń Mánmada quldyqta otyrǵany týraly aıtqan. Olar óz erkimen jumys isteýge barǵan. Osyndaı jaǵdaıda birneshe adamdy qutqarǵan konsýldyń tıisti tájirıbesi bar. Ol atalǵan adamdarǵa quldyqtan bosap shyǵý tásiline qatysty keńes bergen. Bizdiń azamattardy ustap otyrǵan kompanıa qos el shekarasynyń mańynda ornalasqan.
Qazaq jigitteri sol jerdegi ózennen ótip, Taılandqa qashatyn bolyp kelisken. Biraq qashatyn kúni bul týraly jarty saǵat buryn ǵana konsýlǵa eskertken. Al konsýl Bangkoktan atalǵan shekaraǵa jetý úshin avtokólikpen 7 saǵattaı júrýi kerek.
"Qazaqstan azamattary kompanıanyń aýmaǵynan shyqqan boıda kompanıa ókilderi olardyń izine túsken. Beseýiniń tórteýi ózennen ótip úlgergen, al bireýi qalyp ketken. Kompanıa kúzetshileri ony ustap aldy", - dedi SİM ókili.
Taılandqa ótken 4 adamǵa Qazaqstan konsýly kómektesip, olar Bangkokke jetti. 3-4 kúnde olar Qazaqstanǵa oralady. Al Mánmada qalǵan adammen bir aptadan beri baılanys joq.
"Sol kompanıanyń basshylyǵyna jáne kúzetshilerine habarlastyq. Olar bizge naqty jaýap bermedi. Qolda bar aqparatqa saı, olar ár adamǵa 6 mln teńge suraǵan. Qazir kelissózdi jalǵastyryp jatyrmyz. Kompanıa ókilderi jaýap berse, ol jigitti alyp shyǵýǵa múmkindik bolady", - dep túıindedi sózin Aıbek Smadıarov.