Prezıdent Qazaqstan-Fransıa úkimetaralyq komısıasynyń teń tóraǵasy Olıve Beshtti qabyldady
Memleket basshysy Qazaqstan-Fransıa úkimetaralyq komısıasynyń teń tóraǵasy Olıve Beshtti qabyldady, dep habarlaıdy Almaty-akshamy.kz Aqordaǵa silteme jasap.
Prezıdent Fransıanyń Syrtqy saýda, ekonomıkalyq tartymdylyq jáne sheteldegi fransýz azamattarynyń isteri jónindegi mınıstr-delegaty, Qazaqstan-Fransıa úkimetaralyq komısıasynyń teń tóraǵasy Olıve Beshtti qabyldady.
Memleket basshysy joǵary laýazymdy dıplomatqa iltıpat bildire otyryp, qazaq-fransýz qarym-qatynastarynyń deńgeıin joǵary baǵalady jáne onyń elimizge alǵashqy resmı sapary barlyq saladaǵy strategıalyq seriktestikke tyń serpin beretinine senimdi ekenin aıtty.
– Fransıa – Eýropadaǵy eń basty seriktesimiz. Yntymaqtastyǵymyzdy odan ári nyǵaıtýǵa múmkindigimiz mol ekenine senimdimin, – dedi Qasym-Jomart Toqaev.
Kezdesýde Qasym-Jomart Toqaevtyń Fransıaǵa jasaǵan saparynyń qorytyndysy boıynsha, sonyń ishinde saýda-ekonomıkalyq jáne ınvestısıalyq salalarda qol jetkizilgen ýaǵdalastyqtardy júzege asyrý máseleleri talqylandy.
Memleket basshysy Qazaqstan naryǵyna, ásirese munaı-gaz hımıasy, jasyl energetıka, avıasıa jáne óńdeý ónerkásibi, kólik jáne logıstıka salalaryna fransýz bıznesin keńinen tartý úshin barlyq qajetti jaǵdaıdy jasaýǵa daıyn ekenin aıtty.
Olıve Besht Memleket basshysyna qonaqjaılyq kórsetkeni úshin alǵysyn aıtyp, Qazaqstan men Fransıa arasyndaǵy yntymaqtastyqtyń qarqyndy damýyna kóńili tolatynyn jetkizdi.
– Byltyr qarasha aıynda Parıjge jasaǵan resmı saparyńyz óte sátti boldy jáne ekijaqty qarym-qatynastarǵa naqty saıası serpin berdi. Prezıdentimiz Sizben aradaǵy jaqsy qarym-qatynasty odan ári nyǵaıtýdy mańyzdy dep sanaıdy. Bul bizge asa mańyzdy halyqaralyq máseleler boıynsha jan-jaqty pikir almasýǵa múmkindik beredi. Sondyqtan Prezıdentimiz seriktestigimizdi damytýǵa barynsha kúsh salýymdy surady. Qazaqstan – senimdi seriktes, dostas memleket ári Ortalyq Azıadaǵy bizben strategıalyq baılanys ornatqan jalǵyz el, – dedi mınıstr-delegat.
Kezdesý barysynda halyqaralyq kún tártibindegi ózekti máseleler de qarastyryldy.