Syrtqy ister mınıstrligi Reseıdegi oqıǵalar fonynda qazaqstandyqtardy evakýasıalaý qajettiligin baǵalady, - dep habarlaıdy Almaty-akshamy.kz Tengrinews.kz-ke silteme jasap.
QR Syrtqy ister mınıstrliginiń resmı ókili Aıbek Smadıarov eki el arasyndaǵy shekaranyń ashyq ekenin jáne Reseıde eshqandaı soǵys jarıalanbaǵanyn atap ótti.
"Reseıdegi jaǵdaıǵa baılanysty elge qaıtqysy kelgen stýdentter boldy. Keıingi 2-3 kúnde azamattarymyzdy nege evakýasıalamaısyzdar degen suraqtar kóp boldy. Eki el shekarasy ashyq, Reseıde eshqandaı soǵys jarıalanǵan joq dep jaýap beremin. Áýe qozǵalysy da qalypty jumys istep tur, poıyzdar men kólikter júrip jatyr. Ár adamnyń óz erki bar. Bul bizdiń azamattardy evakýasıalaıtyn jaǵdaı emes", - dedi ol.
Onyń aıtýynsha, bıylǵy birinshi toqsanda Reseıdiń kóshi-qon qyzmetine 110 myńnan asa qazaqstandyq tirkelgen, onyń 65 myńnan astamy - stýdentter.