Qazaqstan Respýblıkasy UQK Shekara akademıasy shekarashy ofıser kadrlaryn daıyndaıtyn elimizdegi birden-bir ári Táýelsiz Memleketter dostastyǵy aýmaǵyndaǵy baı tarıhy bar, biregeı oqý orny bolyp tabylady.
Óziniń dańqty jolymen aıshyqtalǵan áskerı oqý orny alǵashynda F.Dzerjınskııdiń atymen atalǵan Almaty shekara ýchılıshesi Keńes Odaǵy aýmaǵyna tipti, odan tys jerlerge de áıgili boldy. Búginde atalmysh oqý orny QR UQK Shekara akademıasy degen atqa ıe, dep habarlaıdy Almaty-akshamy.kz.
Shekara akademıasynan túlep ushqan túlekter onyń dańqyn asyryp keledi. Olar Uly Otan soǵysy kezinde, beıbit kúnde de erjúrekpen Memlekettik shekara shebin kúzete bildi. Ǵasyrǵa jýyq tarıhy bar bilim ordasyn osy jyldary 35 000 myńnan astam túlek bitirdi. Onyń 45 túlegi Keńes Odaǵynyń batyry, bireýi eki márte jáne beseýi Reseı batyry ataǵyna ıe boldy. Sondaı-aq atalmysh oqý ordasynyń 300-den astam túlegi general ataǵyna qol jetkizdi.
Búginde aǵa býyn urpaqtyń dańqty jaýyngerlik dástúrin jalǵastyrǵan izbasarlary egemendi Qazaqstannyń shekarasyn senimdi kúzetýde jáne Qazaqstan Respýblıkasy Shekara qyzmetiniń áskerı birlestikterimen bólimderi, basqa da bólimshelerinde biliktilikpen basshylyq jasaýda.
Táýelsizdik alǵan jyldan beri Akademıany 8 myńnan astam ofıser bitirdi. Olar alǵashqy qyzmet joldaryn shalǵaıda ornalasqan shekara zastavasy bastyǵynyń orynbasary bolyp bastaıdy.
Shekara akademıasynda 70-ten asa ǵylymı qyzmetker tabysty eńbek etip keledi. Onyń 7 ǵylym doktory, 29 ǵylym kandıdaty, 12 PhD doktory, 28 profesorlarmen dosentter abyroıly qyzmet etip júr.
2023 jyldyń 24 maýsymynda QR UQK Shekara akademıasyn 200-den astam shekarashy kýrsant oqýyn oıdaǵydaı aıaqtady. Onyń ishinde 30 túlek úzdik dıplom ıegeri atandy. 3 kýrsant Prezıdent qolynan alǵashqy «leıtenant» áskerı shenin aldy.
Aıta ketý kerek, bıyl tuńǵysh ret Ulttyq qaýipsizdik komıteti Akademıasynyń 50-ge jýyq kýrsanty shekarashylarmen birge dıplom men tós belgisin aldy. Olardyń arasynda jalǵyz qyz bar. Bolashaq qaýipsizdik qorǵandarynyń 25 túlegi de oqýyn úzdik dıplomǵa bitirgen. Onyń tórteýi « Sport sheberligine úmitker» eken.
4 jyl oqyp Shekara akademıasynan túlep ushqan jas leıtenanttar oqý- bilimnen bólek sportta da bıik jetistikterge qol jetkizdi. Atap aıtqanda, 12 túlek «Qazaqstan Respýblıkasynyń sport sheberine úmitker» atansa, 5 túlek «Qazaqstan Respýblıkasynyń sport sheberi» ataǵyn alǵan. Al, 90 kýrsantqa «Úzdik sportshy jaýynger» sporttyq ataǵy berilgen.
Saltanatty sharaǵa ulttyq qaýipsizdik organdarynyń basshylary men bitirýshi túlekterdiń ata-analary jáne týystary qatysty. Shara bastalmas buryn balalarynyń qýanyshyna jınalǵan qonaqtarǵa tárbıelik, áleýmettik-quqyqtyq jáne ıdeologıalyq jumystar basqarmasynyń uıymdastyrýymen konserttik baǵdarlama usynyldy.
Alǵash bolyp bitirýshi túlekter bir-bir sulý qyzben váls bılep, ózderin tamashalap turǵan ata-analarynyń kóńiline qýanysh uıalatty. Óıtkeni, munda ár kýrsantpen bılep júrgen sulý olardyń aldaǵy ýaqytta turmysqa shyǵatyn qyzdary bolmasyna kim kepil?!
Sodan keıin kópshiliktiń aldyna shyqqan kýrsanttar karabındermen defıle kórsetti. Defıle – asqan shapshańdyqty, rettilikti, ádemilikti jáne qyraǵylyqty qajet etetin óner..
Shekara qyzmeti kınologıa basqarmasynyń demonstrasıalyq qoıylymy da jınalǵandardyń kóńilinen shyqty. Munda qyzmet ıtiniń kómegimen túrli kórinister kórsetilip, qyzmet ıtiniń Memlekettik shekarany qorǵaýda taptyrmas kómekshi ekeni kórsetildi.
Ásirese, «Boran» desanttyq moto-monevrlik shabýyldaýshy tobynyń Memlekettik shekara buzýshyny quryqtaý ádisi kórermenge qatty áser etti. Arnaıy daıyndyqta júretin qyraǵy shekarashylar qoıan-qoltyq urysynan túrli ádis-tásilder kórsetti. Mundaı kórinisti tek kınodan ǵana kóretin ata-analar Memlekettik shekaranyń berik qalqanyna aınalǵan saıypqyran áskerı qyzmetshilerdiń ónerine erekshe tánti boldy.
Akademıanyń plasynda qazdaı tizilgen shekarashy kýrsanttardy quttyqtaý úshin Ulttyq qaýipsizdik komıteti Tóraǵasynyń orynbasary Qalqabaev Marat Ómirbekuly sóz aldy. Sodan keıin ata-analardyń atynan -Adılgazınov Erjan Zaınýllınovıch sóz sóılep jas leıtenanttardyń aldaǵy qyzmetine sáttilik tiledi.
Al, túlekter atynan leıtenant Erjan Bekbolatov barsha qarýlas dostaryn búgingi qýanyshty kúnimen shyn júrekten quttyqtady.
Shara barysynda áskerı mindetterin oryndaýda qaza tapqan Shekara akademıasynyń túlekterine, kýrsanttary men qyzmetkerlerine áskerı qurmet kórsetý quqyǵy - leıtenanttar Anýarbek pen Nazarbaıulyna berildi. Qos shekarashy gúl shoqtaryn sondaı uqyptylyqpen qadam basyp eskertkish basyna qoıdy.
Gúl shoǵyn qoıý - qaza tapqandarǵa qurmet kórsetip, ultymyzdyń qaýipsizdigi úshin óz ómirlerin arnap, qyzmettik boryshyn atqarý kezinde qaıǵyly jaǵdaıda ómirlerimen qosh aıtysqan áskerı qyzmetshilerdi eske alýdy qamtıdy.
Búginde Shekara akademıasy - ofıser kadrlardy daıarlaýǵa qoıylatyn talaptardyń barlyǵyna jaýap beretin zamanaýı joǵary jáne joǵary bilimnen keıingi bilim berý uıymy. Kásibı bilikti oqytýshy quram, úzdik ádistemelik jáne materıaldyq-tehnıkalyq baza, bilim alýshylardyń jekelegen qajettilkterine oraı yjdaǵattylyqpen qoldanylatyn ádister, túlekterdiń Qazaqstan Respýblıkasynyń shekarasyn qorǵaýdaǵy mindetterin tabysty oryndaýǵa múmkindik beretin komandırlik daǵdylaryn qalyptastyrýǵa, zamanaýı kásibı quzirettelikti ıgerýlerine barlyq jaǵdaıdyń jasalýyn qamtamasyz etedi.