27 maýsym men 2 shilde aralyǵynda Astanada bokstan Elorda CUP-2023 bedeldi halyqaralyq jarysy ótedi. Týrnırge álemniń kóptegen elinen ataqty áýesqoı boksshylar, onyń ishinde Olımpıada oıyndarynyń júldegerleri men Álem chempıondary qatysady, dep habarlaıdy Almaty-akshamy.kz Zakon.kz-ke silteme jasap.
Jarysqa Ózbekstan, Úndistan, Japonıa, Qytaı, Túrikmenstan, Taıland, Mońǵolıa, Bahreın, Tájikstan, Serbıa jáne Qazaqstan quramalarynan 200-den astam bylǵary qolǵap sheberleri qatysady. Rıng ıeleri birneshe quramda óner kórsetedi, olardyń arasynda jaqynda Tashkentte ótken 2023 jylǵy álem chempıonatynda erekshe kózge túskender sportshylar da bar. Týrnırdiń maqsaty týraly qazaqstandyq quramanyń bas bapkeri Myrzaǵalı Aıtjanov aıtyp berdi.
"12-26 maýsym aralyǵynda Astanada oqý-jattyǵý jıyny ótip jatyr. Ulttyq qurama músheleri elorda kýbogyna qatysý úshin daıyndyq maqsatynda osynda jınaldy. Bul jarys keıbir jigitterimiz úshin Azıa oıyndary aldyndaǵy irikteý jarysy dep aıtsaq ta bolady, al keıbirine sheberlikterin shyńdaý úshin qajet. Osy kezde Eýropa Kýbogy ótip jatqandyqtan bizge kóptegen el kele almaıdy. Biraq nıet tanytyp otyrǵandar jeterlik. Bul jarys bizde jylda ótedi, ol iri oıyndar aldynda sportshylarymyzdy tekserip, shama-sharqyna baǵa berýge múmkindik beredi",-deıdi Myrzaǵalı Aıtjanov.
Elorda CUP-2023 jarysynda el namysyn Sáken Bıbosynov, Mahmud Sabyrhanov, Dýlat Bekbaýov, Aslambek Shymbergenov jáne basqa da kóptegen álem chempıondary qorǵaıtyn bolady.
Áıelder quramasy sapynda Alýa Balqybekova, Nazym Qyzaıbaı, Jaına Shekerbekova, Karına Ibragımova jáne Valentına Halzova óner kórsetedi.