Jumys isteıtin halyqtyń múddesin qorǵaý maqsatynda mindetti áleýmettik saqtandyrýmen áleýmettik táýekelder týyndaǵan jaǵdaılarda eńbekke qabilettiliginen; asyraýshysynan; jumysynan aıyrylý; júktilikke jáne bosanýǵa baılanysty kirisinen aıyrylý; jańa týǵan balany (balalardy) asyrap alýǵa baılanysty kirisinen aıyrylý; bala bir jarym jasqa tolǵanǵa deıin kútimine baılanysty kirisinen aıyrylýy jaǵdaılaryna áleýmettik tólemder kózdelgen.
Memlekettik áleýmettik saqtandyrý qorynan taǵaıyndalatyn áleýmettik tólemderdiń mólsheri ár qatysýshyǵa jeke esepteledi jáne qorǵa áleýmettik aýdarymdardyń ýaqtyly jáne tolyq tólenýine tikeleı baılanysty bolady.
Aıta ketý kerek, áleýmettik aýdarymdar mindetti zeınetaqy jarnalary sıaqty qyzmetkerdiń jalaqysynan ustalmaıdy, jumys berýshilerdiń nemese dara kásipkerlerdiń óz qarajaty esebinen tólenedi.
Osyǵan baılanysty, áleýmettik táýekelder týyndaǵan kezde qor júıeniń qatysýshylaryna áleýmettik tólem taǵaıyndaýǵa ótinish jasamas buryn qorǵa naqty túsken áleýmettik aýdarymdardy tekserýdi usynady. Atalǵan aqparatty elektrondyq úkimettiń egov.kz portaly arqyly nemese ekinshi deńgeıli bankterdiń mobıldik qosymshalary, sondaı-aq «Azamattarǵa arnalǵan úkimet» Memlekettik korporasıasynyń (HQKO) bólimshelerine nemese qordyń fılıalyna jeke basyn kýálandyratyn qujatpen júgine otyryp alýǵa bolady.
Sıfrlyq tehnologıalardyń damýymen áleýmettik tólemderdi taǵaıyndaý úshin júginý rásimderi jeńildetildi. Qazirgi ýaqytta ótinish berýshi memlekettik organdardyń aqparattyq júıelerinde málimetteri joq qujattardy ǵana usynady.
Qordan áleýmettik tólemderdi taǵaıyndaý úshin dástúrli túrde HQKO arqyly da, úıden shyqpaı-aq elektrondy túrde de júginýge bolady.
Qazirgi ýaqytta memlekettik qyzmetterdi proaktıvti nysanda kórsetý ózekti bolyp otyr, onyń ishinde Otbasynyń sıfrlyq kartasy arqyly, atap aıtqanda memlekettik organdardyń aqparattyq júıelerinde tıisti málimetter bolǵan kezde júıege qatysýshyǵa tólem alý quqyǵyn iske asyrý týraly «1414» Biryńǵaı baılanys ortalyǵy arqyly sms-habarlama jiberiledi. Sms-habarlamaǵa kelisim alǵan jaǵdaıda tólem proaktıvti túrde taǵaıyndalady.
Tólemderdi taǵaıyndaý kezinde qordyń fılıaldary qujattardyń (málimetterdiń) durystyǵyn tekseretinin atap ótken jón. Osyǵan baılanysty, áleýetti alýshylardyń múddelerin qorǵaý maqsatynda, áleýmettik aýdarymdardyń ýaqytyly jáne tolyq tólenbegen, sondaı-aq tólengen áleýmettik aýdarymdar somalarynyń mindetti zeınetaqy jarnalary aýdarylǵan qyzmetkerdiń kirisine sáıkes kelmegen jaǵdaıda qor elektrondy is maketin jete resimdeýge jiberedi. Osyndaı jaǵdaılarda tólemderdi taǵaıyndaý merzimi 30 jumys kúnine deıin uzartylyp, memlekettik kirister organdarynan qosymsha málimetter jáne (nemese) jumys ornynan túsken kirister týraly anyqtama jáne t.b. qujattar talap etiledi.
Taqyrypqa oraı aıta keteıik, Almaty qalasy boıynsha bıylǵy 8 aıda júıeniń 898 myń qatysýshysy úshin 10,5 mlrd teńge somaǵa áleýmettik aýdarymdar túsip, 64,5 myń adam 8,5 mlrd teńge somaǵa áleýmettik tólemder aldy.