Qazaqstandyq jáne sheteldik jetekshi sarapshylar Almaty tórinde ótken halyqaralyq konferensıada údemeli júrek qyzmetiniń jetkiliksizdigin emdeý máselelerin talqylady.
Elimizdiń, AQSH, Túrkıanyń jáne Shveısarıanyń kardıologıa, ıntervensıalyq kardıologıa jáne kardıohırýrgıa salasyndaǵy bilikti mamandar bas qosqan alqaly jıyndy Kardıologıa jáne ishki aýrýlar ǴZI, «University Medical Center» korporatıvtik qory jáne Qazaqstan júrek qyzmetiniń jetkiliksizdigi qoǵamy uıymdastyrdy.
S.Asfendıarov atyndaǵy QazUMÝ rektory Marat Shoranov, Kardıologıa jáne ishki aýrýlar ǴZI Basqarma tóraǵasy Marat Pashımov quttyqtaý sóz sóıledi.
Marat Shoranov óz sózinde «Sozylmaly júrek qyzmetiniń jetkiliksizdigi problemasy densaýlyq saqtaý júıesi men jalpy qoǵam úshin asa mańyzdy bolyp otyr. Pasıentterdiń osy kontıngentin aýrýhanaǵa jatqyzýdyń jıiligi, ólim-jitim sanynyń artýy, emdeý men ońaltýǵa ketetin qomaqty shyǵyndar densaýlyq saqtaý júıesine aıtarlyqtaı aýyrtpalyq ákeledi», – dep atap ótti.
«Údemeli júrek qyzmeti jetkiliksizdigin emdeýde aıtarlyqtaı jetistikterge qol jetkizildi. Jańa dári-dármekter, ınovasıalyq tehnologıalar, ımplantasıa qurylǵylary paıda boldy, júrek transplantasıasy damý ústinde. Alaıda, bizdiń aldymyzǵa erte satysynda dıagnostıka jasaý, pasıentterdiń emdelýge beıimdiligin arttyrý, júrek qyzmeti jetkiliksizdiginiń boljamyn jaqsartý úshin jańa joǵary tehnologıalyq qurylǵylardy engizý sıaqty mańyzdy máseleler tur», – dedi Marat Edigeuly.
KİAǴZI birinshi basshysy Marat Pashımovtyń aıtýynsha, sozylmaly júrek qyzmetiniń jetkiliksizdigi – júrek-qan tamyrlary aýrýlarynyń jıi kezdesetin asqynýlarynyń biri, sonymen qatar ómir sapasynyń tómendeýiniń jáne ólim-jitim sanynyń artýynyń basty sebepteriniń biri. Sondyqtan búgingi ótkizilip otyrǵan konferensıa asa ózekti bolyp tabylady. Qazaqstandyq jáne sheteldik kardıologıa jáne kardıohırýrgıa mamandarynyń SJJ bar pasıentterdi dıagnostıkalaý men emdeýdegi ózara is-qımyly men tájirıbe almasýy bizdiń pasıentterimizdiń ómirin uzartýǵa jáne ómir sapasyn jaqsartýǵa, naýqastarǵa kómek kórsetý júıesin neǵurlym joǵary deńgeıge kóterýge múmkindik beredi.
Konferensıa aıasynda seksıalyq otyrystar ótti. Onda qatysýshylar LVAD ımplantasıasyna pasıentterdi qalaı irikteletindigin aıtyp, Astana, Almaty, Shymkent jáne Taraz qalalarynda ımplantasıa jasaý tájirıbesimen bólisti (LVAD tek osy qalalarda jasalady), operasıadan keıingi kezeńniń negizgi erekshelikterin, ambýlatorıalyq jaǵdaıda pasıentterdi baqylaý máselelerin, sondaı-aq LVAD ımplantasıasynan keıin pasıentterge kútim jasaýdaǵy meıirgerlerdiń róli jáne t.b. máselelerdi talqylady. Konferensıa jumysyna qatysqan qatysýshylarǵa sertıfıkattar berildi.
Erteńine Kardıologıa jáne ishki aýrýlar ǴZI-da pasıentterge keńes berý, LVAD mehanıkalyq qurylǵysyn jáne Mitraclip ımplantasıalaý operasıalary boıynsha sheberlik klastar ótti.
Mitraclip – bul operasıa Almatyda alǵash ret profesor Maurizio Taramasso (Súrıh, Shveısarıa) basshylyǵymen júrgizildi. Bul – MitraSlip júıesiniń kómegimen mıtraldy qaqpaqshanyń endovaskýlárlyq klıpteý. MitraClip – ashyq hırýrgıalyq operasıa jasaýǵa bolmaıtyn pasıentterge júrek jumysyn jaqsartýdyń jalǵyz múmkindigi. Bul az ınvazıvti prosedýrany qoldaný pasıenttiń qalpyna kelý kezeńin qysqartýǵa múmkindik beredi, naýqastyń jaǵdaıynyń jaqsarýy anestezıadan shyqqannan keıin birden seziledi. Naýqastar tez jazylady. Olardyń ómir súrý sapasy edáýir jaqsarady, entigýi azaıady, jattyǵýlarǵa tózimdiligi artady, medısınalyq kómekke júginý jıiligi tómendeıdi. Aıta ketý kerek, 2020 jyly MitraClip qurylǵysy eń jaqsy medısınalyq tehnologıa retinde Rrix Galien USA (Nobel syılyǵynyń balamasy) syılyǵymen marapattaldy.
LVAD ımplantasıalaý operasıasy Ankara (Túrkıa) profesory Umit Kervan qatysýymen SJJ dıagnozymen júrek qyzmeti tómendegen 51 jastaǵy pasıentke jasaldy.