Uıymdastyrýshylardyń sózinshe, jarysqa qatysýǵa 60-qa jýyq adam ótinim bergen
Shymbulaqta kásibı snoýbordshylar men shańǵyshylar arasynda úlken saıys ótpek. Oǵan otandyq sportshylarymyzdan bólek, sheteldik sheberler de qatysqaly otyr, dep habarlaıdy Almaty-akshamy.kz Almaty.tv-ge silteme jasap.
Saıystyń uıymdastyrýshylary qala turǵyndary men qonaqtaryn senbilik demalysty taý-shańǵylyq kýrortynda ótkizýge shaqyrady. Sózderine sensek, onda sýsyn da, kózdiń jaýyn alar shoý da tegin bolmaq.
Altynshy ret uıymdastyrylyp jatqan Gorilla Winter Jungle bıyl teńiz deńgeıinen 3200 metr bıiktikte ótedi. Ekstremaldy jarysqa Qazaqstannyń ǵana emes, Qyrǵyzstan men Reseıden, Eýropa men TMD memleketinen kelgen kil myqtylary qatysady. Saıystyń júlde qory – 5 mıllıon teńge.
«Biz muny nege uıymdastyryp otyrmyz? Basty maqsatymyz – salaýatty ómir saltyn nasıhattaý. Ásirese, snoýbord pen shańǵy sportynyń Qazaqstanda da damyǵanyn qalaımyz. Erteń bolatyn jarys qatysyp jatqan raıderlerdi ǵana emes, kórýge kelgen jurtty da qanattandyrý kerek. Olarǵa erekshe emosıa syılaıdy dep senemiz. Sebebi sportshylar osy joly bar ónerin kórsetedi», – dedi Gorilla Energy PR-qyzmetiniń jetekshisi Aleksandr Kýchýra.
Uıymdastyrýshylardyń sózinshe, jarysqa qatysýǵa 60-qa jýyq adam ótinim bergen. Odan bólek, saıystyń kórkin qyzdyrý maqsatynda 16 sportshy shaqyrtylǵan. Onyń 8-i shańǵyshy, 8-i snoýbordshy. Barlyǵy – sport sheberleri, arasynda Eýropadan kelgen maıtalmandar da bar.
«Shymbulaq jaıly kóp estıtinmin. Óz kózimmen kórip, keremet sezimge bólenip turmyn. Bul birinshi ret kelýim. Munda ótetin jarys ta joǵary deńgeıde uıymdastyrylyp jatyr. Erejesi de erekshe eken. Mysaly, sekirgende bir ádisti qoldansań, keleside basqasyn oılap tabý kerek. Sheberligimiz synǵa túsedi», – dedi Gorilla Winter Jungle saıysyna qatysýshy Stıpan Karpel (Polsha).
«Ózim 12 jyldan astam ýaqyt snoýbordpen shuǵyldanamyn. Reseıde Big Air dısıplınasynan chempıonmyn. Bul jerdegi jarys joǵary deńgeıde ótedi degen oıdamyn. Bári jeńis úshin ǵana kelgen», – dedi Gorilla Winter Jungle saıysyna qatysýshy Iaroslav Lenchevskıı (Reseı).
Bıylǵy jarystyń taǵy bir ereksheligi - bul joly Gorilla Pro team komandasy arnaıy shaqyrylǵan sportshylarmen saıysatyn bolady. The Battle dep atalatyn jańa formatta shańǵyshylar men snoýbordshylar baq synamaq. Aıta ketsek, aýqymdy is-shara osy senbide Shymbulaqtyń eń bıik núktesinde ótedi.