Polısıa departamenti reıdtik sharalardy kúsheıtpek
Almatyda 2 aı ishinde moped júrgizýshileriniń qatysýymen 82 jol-kólik oqıǵasy tirkeldi. Saldarynan 80-nen asa adam zardap shegip, ártúrli deńgeıdegi dene jaraqatyn aldy, dep habarlaıdy Almaty-akshamy.kz Almaty.tv-ge silteme jasap.
Almatyda kóktem kelisimen moped pen motosıkl minýshilerdiń qatary kúrt artady. Ásirese, qos dóńgelekti taqymdaǵandar tamaq jetkizý qyzmetiniń kýrerleri. «Olar tapsyrys berýshilerge ystyq asty tez tasymaldaý úshin keıde jyldamdyqty arttyryp, jol erejesin saqtamaıdy» deıdi temir tulpar júrgizýshileri. Oǵan qosa, mopedke otyrǵandardyń júrgizýshi kýáligi joq.
«Jol erejesin saqtamaıdy. Baǵdarshamda kólikterdiń arasynan ótip, jol-kólik apatyna sebep bolady. Aqsha taýyp júr, bárin túsinemiz. Biraq adamgershilikti saqtaý kerek qoı», – dedi qala turǵyny Azamat Naýryzbaev
Al tańnan keshke deıin, aýa-raıynyń qolaısyzdyǵyna qaramastan aýyr eńbek etemiz degen moped tizgindegen kýrerlerdiń óz shyndyǵy bar. Olardyń aıtýynsha, jeńil kólikter jol bermeıdi
«Mopedter jol erejesin saqtaýǵa tyrysady. Jeńil kólikter jol bermeı, qysyp ketedi», – dedi kýrer Zıat Muhamedjan
«Kóz aldymda birneshe jol apaty boldy. Ekeýi de baıqamaı qalady», – dedi kýrer Qýanysh Jeksen.
Al qalalyq polısıa departamenti kúnniń jylynýyna baılanysty reıdtik sharalardy kúsheıtpek. Ókinishtisi, moped pen elektrli samokat mingenderge tártip saqshylary eshteńe isteı almaıdy. Óıtkeni, ol kólik quraly esebinde joq.
«Birinshiden, bul – profılaktıkalyq turǵysyndaǵy reıdtik is-sharalar, jol júrý prosesine qatysýshylardyń barlyǵy, sonyń ishinde moped, samokat, velosıpedterdiń júrgizýshileri jol júrý erejesin qatań saqtaýy tıis. Óıtkeni, bul – adamnyń ómiri, adamnyń densaýlyǵy jáne qaýipsizdik máselesi. Bul suraqqa jalpylama jaýap berýdiń qajeti joq. Ár jol júrý prosesine qatysýshy óziniń jaýapkershiligin sezinýi kerek», – dedi Almaty qalasy Polısıa departamentiniń resmı ókili Saltanat Ázirbek.
«Jyl saıyn mopedke otyrǵandardyń sany artyp jatyr. Jyl mezgiline qaramaı paıdalanady. Velosıpedten tez júretin kóliktiń barlyǵyn esepke alý kerek. Olarda da kólik júrgizetinin rastaıtyn qujaty bolýy qajet. Bul aıtarlyqtaı jaýapkershilikti arttyrady», – dedi sarapshy Alekseı Alekseev
Degenmen, İİM moped pen elektrosamokatty kólik quraly qataryna qosý týraly Parlament Májilisine zań jobasyn usynǵan bolatyn. Endi jańa saılanǵan Parlament májilisiniń depýtattary zań jobasyn qarastyrady. Iaǵnı, moped kólik quraly bolyp tanylǵan soń ǵana, jol erejesin retteýge múmkindik bar.