5G jelisin taratýdyń tehnıkalyq máseleleri talqylandy
Qazaqstanda azamattar men bıznes úshin birqatar jańa sıfrlyq servısti iske qosý jáne «Elektrondyq úkimettiń» arhıtektýrasyn jańǵyrtý josparlanyp otyr. QR Premer-Mınıstri Álıhan Smaıylovtyń tóraǵalyǵymen ótken Sıfrlandyrý máseleleri jónindegi komısıa otyrysynda osy jáne basqa da máseleler qaraldy, dep habarlaıdy Almaty-akshamy.kz.
Sıfrlyq damý, ınovasıalar jáne aeroǵarysh ónerkásibi mınıstri Baǵdat Mýsın búgingi tańda memlekettik organdardyń bıyl iske asyrý josparlanyp otyrǵan 66 sıfrlyq bastamasynyń tizbesi pysyqtalǵanyn baıandady.
Olardyń ishinde múgedektikti belgileý úshin medısınalyq-áleýmettik saraptamany sıfrlandyrý, mektepke deıingi uıymdarǵa qabyldaý úshin biryńǵaı sıfrlyq kezekti iske qosý, aýyl sharýashylyǵy janýarlaryn esepke alý boıynsha Vet Mobile qosymshasyn engizý, áskerden bosatý nemese ony ýaqytsha keıinge qaldyrý rásimin avtomattandyrý, notarıaldyq qyzmetterdi elektrondyq formatqa kóshirý qyzmetteri bar.
Osy bastamalardy iske asyrý azamattar men bıznestiń kúndelikti ómirdegi máselelerin sheshýge baǵyttalǵan, endi olar qaǵazbastylyqqa salynyp, tabaldyryq tozdyrmaıdy jáne uzaq ýaqyt kezek kútpeıtin bolady.
Sonymen qatar turǵyn úı alýǵa sıfrlyq kezek engizý, onlaın rejımde eńbek sharttaryn jasasý jáne mobıldi qosymshada jeke tulǵalar úshin kedendik deklarasıalaýdan ótý múmkindigi, azamattardy medısınalyq profılaktıkalyq qyzmetterdi alý qajettigi nemese óz óńirinde jumysqa ornalasý múmkindigi týraly habardar etý (push-habarlama), janar-jaǵarmaı quıý stansıasynda munaı ónimderiniń bar-joǵyn tekserý boıynsha servısti jáne t.b. iske qosý josparlanýda.
Sonymen qatar derektermen jumys isteý máselesi talqylandy, ol – búrokratıadan aryltýdyń negizgi elementi, osy oraıda azamattardan túrli málimetter suratylmaýy kerek.
Premer-Mınıstr usynylǵan bastamalardy maquldady, sondaı-aq sıfrlandyrýdy ilgeriletý jáne qyzmet kórsetýdiń proaktıvti formatyn keńeıtý halyqtyń ómir súrý sapasyna oń áserin tıgizetinin atap ótti.
Sondaı-aq otyrysta jer qatynastaryn sıfrlandyrý barysy qaraldy. Osy jumys aıasynda Jyljymaıtyn múliktiń biryńǵaı memlekettik kadastryn kezeń-kezeńmen iske qosý josparlanyp otyr, onyń negizinde jer resýrstarynyń jarıa kadastrlyq kartasy jáne elektrondyq saýda alańy iske asyrylatyn bolady.
Álıhan Smaıylov ASHM-ge aýyl sharýashylyǵy jerlerin sıfrlandyrý prosesin uıymdastyrý tásilderin qaıta qaraýdy tapsyrdy.
Odan bólek, otyrys barysynda respýblıka óńirlerin keń jolaqty ınternetpen qamtamasyz etý jónindegi sharalar jáne 5G jelisin taratýdyń tehnıkalyq máseleleri talqylandy, sondaı-aq sapaly qurylymdalǵan derekter negizinde memlekettik basqarýdy sıfrlyq transformasıalaý tásilderi qaraldy.