Tártip saqshylary halyqaralyq FIS erejesiniń saqtalýyn qadaǵalaıdy
Arnaıy daıyndyqtan ótken polıseıler «Shymbulaq» taý shańǵysy bazasynda qoǵamdyq tártipti qadaǵalaıdy. Olar asynyp júretin úırenshikti áskerı qarýlarynyń ornyna, shańǵy alady, dep habarlaıdy Almaty-akshamy.kz QazAqparatqa silteme jasap.
«Shymbulaq» taý shańǵysy kýrortynyń dırektory Rınat Ábdirahmanovtyń aıtýynsha, atalǵan joba 2019 jyldan beri júzege asyrylyp keledi.
«Bizde kórinbeıtin maıdan jaýyngerleri bar. Desek te, bıyl qaladan shıpajaı aýmaǵyn shańǵymen júrip baqylaıtyn polısıa qyzmetkerlerin suradyq. Ótinishimiz qanaǵattandyryldy. Kelesi dúısenbiden bastap 10 polısıa qyzmetkerin shańǵy tebýge úıretý úshin oqý prosesin bastaımyz», - deıdi spıker.
Sondaı-aq ol kýrortta shańǵy patrúlderi de jumys isteıtinin aıtty. Bıyl olardyń sany 16 adamǵa artty.
«Olardyń tórteýi shańǵy tebýdiń qaýipsizdigin baqylap, polısıamen birge ózara jumys isteıdi», - dep qosty ol.
Sonymen qatar, spıker demalys ornyndaǵy qaýipsizdik máselesi taý shańǵysy kýrorttarynyń qyzmetin retteıtin zańnyń joqtyǵynan týyndap otyrǵanyn tilge tıek etti.
Onyń aıtýynsha, shańǵy patrúlderi nemese kýrort qyzmetkerleri erejeni buzý týraly eskertkenderi úshin klıentterden jıi zardap shegedi.
Rınat Ábdirahmanov tártip saqshylary halyqaralyq FIS erejesiniń saqtalýyn qadaǵalaıtynyn túsindirdi.
«Demalys kúnderi bes polısıa qyzmetkeri men eki kýrort mamandary, al jumys kúnderi eki polısıa men eki kýrort qyzmetkeri kezekshilikte bolady. Tártip saqshylary Police degen jazýy bar arnaıy keýdeshe kıedi»,- dedi ol.
Jalpy, «Shymbulaq» dırektorynyń aıtýynsha, shıpajaıǵa kelýshiler sany jyl saıyn artyp keledi jáne ótken maýsymda ol absolútti rekordqa jetti – 1 mln astam adam.