Shyǵys Qazaqstan oblysy Zaısan aýdanynda jańa áýejaıdyń qurylysyn salý úshin jobalyq qujattama ázirleý bastaldy, dep habarlaıdy aqshamnews.kz.
Jańa áýejaı Satpaı aýylynda, Zaısan qalasynan 28 shaqyrym qashyqtyqta ornalasady. Bul týraly Zaısan aýdandyq ákiminiń orynbasary Nurǵaını Qabıdoldına óńirlik komýnıkasıalar qyzmetinde ótken brıfıńte málimdedi.
— Áýejaı qurylysyn salý aımaqtyń týrızmin damytýǵa jáne jergilikti turǵyndardyń ómir sapasyn jaqsartýǵa jańa múmkindikter ashady. Biz tek áýejaı salýmen ǵana shektelmeı, sonymen qatar zamanaýı ınfraqurylymdy qurýdy josparlap otyrmyz. Bul ınfraqurylymǵa jańa joldar, logıstıkalyq qoımalar jáne basqa da nysandar kiredi. Olar kólik qoljetimdiligin arttyrýǵa yqpal etedi, — dep atap ótti Nurǵaını Qabıdoldına.
Sonymen qatar, aýdannyń týrısik áleýetin damytýǵa «Omsk — Maıkapshagaı» avtojolyn qaıta jańartý da úlken áser etetin bolady. Jumystar «QazAvtoJol» ulttyq kompanıasynyń tapsyrysy boıynsha júrgizilýde, al jobanyń jalpy quny 17,4 mıllıard teńgeni quraıdy.
Bul iri ınfraqurylymdyq jobalardyń iske qosylýy aımaqtyń ekonomıkalyq áleýetin arttyrýǵa, Shyǵys Qazaqstandaǵy kólik logıstıkasyn jaqsartýǵa jáne jergilikti bıznestiń damýyna oń áserin tıgizedi dep kútilýde.