Ǵ.Músirepov atyndaǵy Qazaq memlekettik akademıalyq balalar men jasóspirimder teatrynda 25-30 sáýir aralyǵynda teatr rejıseri, QR Eńbek sińirgen artısi, «Qurmet» ordeniniń ıegeri Murat Ahmanovtyń shyǵarmashylyq aptalyǵy ótedi.
Ǵ.Músirepov teatrynda qyzmet etip kele jatqan rejıser repertýardaǵy S.Ahmadtyń «Kelinder kóterilisi», B.Muqaıdyń «Shyndyq detektory», Iran-Ǵaıyptyń «Fatıma», «Estaıdyń Qorlany», «Bir túp alma aǵashy» qoıylymdaryn kópshilik nazaryna usynyp, sondaı-aq óziniń qalamynan týǵan «Naýryz dýman», «Ertegiler áleminde» syndy balalarǵa arnalǵan spektáklderin sahnalady.
Shyǵarmashylyq jolyn balet bıshisi retinde bastap, teatr men kıno ónerinde ózindik sara joly men qoltańbasyn qalyptastyrǵan Murat Noıanbaıuly Ahmanovtyń mereıli jasy qarsańynda qazaq teatr ónerindegi eleýli eńbekterine sholý bolmaq. Elimizdiń birneshe teatrynda jemisti eńbek etip, Oral, Taldyqorǵan, Jezqazǵan, Aqtóbe teatrlarynyń damýyna úles qosyp, shyǵarmashylyǵyn rýhanı astanamyzdyń aıtýly ordasy Músirepov teatrynda jalǵap kele jatqan óner ıesiniń kezekti jańa týyndysy aptalyqtyń alǵashqy kúni kórermen nazaryna usynylmaq. «Toıy kóp úı» spektakliniń premerasy 25 sáýir kúni 18:30-da ótedi.
Sahna óneri sardarynyń shyǵarmashylyq aptalyǵy saltanatty túrde sáýirdiń 25-shi juldyzynda ashylyp, teatr foıesiniń ekinshi qabatynda rejıserdiń shyǵarmashylyǵy týraly ǵylymı konferensıa, «Murat Ahmanov» shyǵarmashylyq kitabynyń tusaýkeseri jáne «Toıy kóp úı» spektakliniń premerasy jaıly baspasóz konferensıasy ótedi. Konferensıaǵa rejıser Murat Ahmanov, aqyn, dramatýrg Nurlan Orazalın, teatrdyń artısi Hazıma Nuǵmanova, teatr synshylary Amankeldi Muqan, Baqyt Nurpeıis, Aıjan Ahmet qatysady.
Aptalyqqa rejıserdiń basqa teatrda sahnalaǵan spektáklderi qonaqqa kelip, qala kórermenderine óz qoıylymdaryn usynbaq. Sonymen qatar, aptalyq aıasynda M.Ahmanov rejıserligimen sahnalanǵan 6 spektákl kórermen nazaryna usynylady. 30 sáýir kúni teatr repertýarynda 10 jyldan asa júrip kele jatqan «Kelinder kóterilisi» spektaklimen aptalyq aıaqtalmaq. Sanaly ǵumyryn sahnaǵa arnaǵan sańlaq tek teatr óneriniń tórin ǵana baǵyndyryp qoımaı, kógildir ekranda túrli tulǵalardyń beınelerimen qalyń kópshilikke tanyldy. Atap aıtsaq, «Álkeı.Ǵulama ǵumyr», «Meniń kúnáli perishtem», «Elbasy joly», «Paryz», «Astana – mahabbatym meniń» fılmderiniń negizgi keıipkerlerin somdaǵan.
Shyǵarmashylyqtyń zańǵar shyńyn baǵyndyryp, ónegeli ómirin ónerge arnaǵan tulǵanyń shyǵarmashylyǵyn nasıhattaý, jalyndy jastardy kirshiksiz ónerge baýlý maqsatynda uıymdastyrylǵan shara aýqymdy túrde atalyp ótiledi. Sýretkerlikti súıetin, sahna ónerin san túrli boıaýǵa boıap, kıeli keńistikte kelisti óner týdyra bilgen rejıserdiń shyǵarmashylyǵyna sholý jasaý óreli ónerdiń óristetýdiń joly bolyp sanalady. Sáýleli ónermen sýsyndap, teatr ónerine taǵy bir taban jaqyndaımyn deseńiz, shyǵarmashylyq aptalyqtan qapy qalmańyz, kórermen!