Bul Memleket basshysynyń tapsyrmasy.
Prezıdent tapsyrmasyn oryndaý boıynsha Antıkorrýpsıalyq qyzmet Almaty ákimdigimen birlesip, taý bókterindegi aýdandarda jer bólý jáne qurylys salý máselelerinde sybaılas jemqorlyq qaýpine taldaý júrgizip jatyr, dep habarlaıdy Almaty-akshamy.kz
Sybaılas jemqorlyqqa qarsy qyzmettiń málimetinshe, bul máseleni aldyn ala zerdeleý qurylystyń barlyq kezeńderinde eleýli qaýip baryn kórsetedi. Bul sheneýnikterdiń jer bólýdegi zańsyz áreketterine ákep soǵady. Saldarynan fýnksıonaldyq aımaqtar men nysanaly maqsat ózgeredi, kadastrlyq qun tolyq tólenbeıdi.
Buǵan qosa, Sáýlet jáne qala qurylysy qyzmeti týraly zańnamany buzýshylyqtar anyqtalǵan.
"Mysaly, 2017 jyldan bastap jappaı demalýǵa jáne týrızmge arnalǵan rekreasıalyq aımaqtan turǵyn aımaqqa 286 gektarǵa jýyq jer aýdaryldy. Bul ózgerister ekologtardyń, SES pen órt sóndirýshilerdiń kelisiminsiz iske asyryldy. Qoǵamdyq tyńdaýlar ótkizilmedi. Sonymen birge, qoldanystaǵy Bas jospar 2011 jyly ózektiligin joıdy, al jańasy áli bekitilmegen", delingen Sybaılas jemqorlyqqa qarsy is-qımyl agenttigi taratqan aqparatta.
Sonymen qatar, Agenttik ókilderi taratqan aqparatqa súıensek, tótenshe jaǵdaı qyzmetiniń derekteri boıynsha tasqyn, kóshkin jáne sel qaýpi aımaǵynda 5 000-ǵa jýyq nysan bar. Olarda 26 myń adam turady.
Mysaly, Naberejnaıa kóshesinde tik betkeıdiń astyndaǵy sary topyraqqa 12 turǵyn úı salynǵan. Sońǵy eki jylda landshaftty zańsyz ózgertýdiń 26 faktisi anyqtaldy.
Mysaly, Naýryzbaı aýdanynyń taý bókterindegi ýchaskelerdiń biriniń ıesi ruqsat qujatsyz taýdy úńgı qazǵan. Mamandardyń qorytyndysy boıynsha alynǵan topyraqtyń kólemi 100 myń tekshe metr bolǵan. Bul jerler satý maqsatynda 50 táýelsiz ýchaskege bólingen.
Jerdiń nysanaly maqsatyn ózgertý boıynsha memlekettik qyzmetterdi usyný prosesiniń ashyqtyǵy men baqylaýdyń bolmaýy sybaılas jemqorlyq praktıkasyna alyp keledi.
Aldymen Bas josparǵa sáıkes kelmeý jáne seısmıkalyq jáne sý qorǵaý aımaqtarynda bolý syltaýymen bas tartady. Keıinirek sol ýchaskeler boıynsha ózgertýge kelisim beriledi.
Osyndaı 900-den astam fakt anyqtaldy.
Mysaly, qala turǵynyna ýchaskelerdiń nysanaly maqsatyn ózgertýge bas tartylyp, biraq biraz ýaqyttan keıin olarǵa ruqsat berildi. Bul rette onyń ýchaskeleriniń biri ákimdiktiń laýazymdy tulǵasynyń týysyna aýdarylǵan.
Osy prosesterge baqylaýdyń bolmaýy búdjetke tıisti tólemderdiń túspeýine ákep soǵady. Sońǵy úsh jylda aldyn ala derekter boıynsha nysanaly maqsaty ózgergen kezde kadastrlyq qun aıyrmasy úshin 500 mln teńgeden astam tólenbegen.
Sonymen qatar, tektonıkalyq úzilim aımaqtarynda jerler shyǵaryldy. Osylaısha, jeke kompanıanyń biri aýksıon ótkizbesten medısınalyq ortalyq salý úshin ınvestısıalyq joba túrindegi Qazaqfılm aýdanynda jer ýchaskesin jalǵa aldy. Keıin aıaqtalmaǵan nysan paıdalanýǵa berildi.
Almaty turǵyndary arasynda taý bókterindegi aımaqtyń qurylysy erekshe rezonans týdyrdy
Ruqsat qujattaryn berý jáne kelisý kezinde sybaılas jemqorlyq faktorlary bar ekeni anyqtaldy. Sáýlet organdary jeke úı qurylysynyń eskızin bekitkenimen, is júzinde kóppáterli turǵyn úı kesheni salynady.
"Bul úılerdi sýǵa jáne jylýǵa qosý úshin qolda bar tehnıkalyq sharttar da eskerilmeıdi. Mektepter, balabaqshalar, emhanalar, joldar joq. Úılerdiń qabattylyǵy, zırattardan sanıtarlyq-qorǵaý aımaǵyn qamtamasyz etý boıynsha talaptar buzylady", – deıdi Sybaılas jemqorlyqqa qarsy is-qımyl agenttiginiń mamandary.
Qurylys salýshylar bekitilgen eskızderdi buza otyryp, irgeles aýmaq: trotýarlar, serýendeý aımaqtary jáne balalar alańdary esebinen salynyp jatqan turǵyn úı alańyn ulǵaıtady.
Osy buzýshylyqtar boıynsha qazir qylmystyq ister tergelip jatyr. Sonyń aıasynda laýazymdy tulǵalardyń jaýapkershiligi qaralady. Taldaý jalǵasýda. Onyń túpkilikti nátıjeleri boıynsha atqarýshy jáne ýákiletti organdardyń atyna tıisti usynymdar engiziledi.