Erbolat Dosaev Almatynyń Shuǵyla shaǵyn aýdanynda jańa balabaqsha qurylysyn jyl sońyna deıin aıaqtaýdy tapsyrdy, dep habarlaıdy Almaty-akshamy.kz
Almatynyń Shuǵyla shaǵyn aýdanyndaǵy jańa balabaqsha jyl sońyna deıin paıdalanýǵa beriledi
Oryn tapshylyǵy máselesin sheshý úshin Almaty qalasynyń Naýryzbaı aýdanynda jyl sońyna deıin 1200 oryndyq 4 balabaqsha salynady
Almaty ákimi Erbolat Dosaev Naýryzbaı aýdanyna jumys sapary aıasynda «Shuǵyla» sh/a 320 oryndyq balabaqsha qurylysynyń qarqynyn tekserdi. Onyń mysalynda mektepke deıingi uıymdardaǵy oryn tapshylyǵy máselesin sheshý boıynsha qabyldanyp jatqan sharalarmen tanysty.
Balabaqshanyń qurylysy 2022 jyldyń mamyr aıynda bastaldy. Qurylystyń normatıvtik merzimi-10 aı. Kesteden artta qalýǵa qatysty qala ákimdigi aǵymdaǵy jyldyń qyrkúıek aıynda «Astana-Stroıınvest» korporasıasy JSHS merdigerlik uıymyna isin qozǵady. Qazirgi ýaqytta sot prosesi júrip jatyr.
Nysandy aralaý kezinde qala basshysyna búgingi kúni monolıtti jumystar aıaqtalyp, keramıkalyq kirpishten jasalǵan qabyrǵalar qalanyp, eden tóseý jumystary júrgizilgeni baıandaldy. Qasbet, qurylymdar tolyǵymen ornalastyrylǵan, sondaı-aq jeldetýdi uıymdastyrý, ınjenerlik jelilerdi tóseý jumystary júrgizildi. Qazirgi ýaqytta elektr jelileri tartylyp, jylytý jolǵa qoıyldy. Merdiger kompanıa ıntererdi bezendirý, abattandyrý, sondaı-aq tehnıkalyq jabdyqtardy satyp alý jáne jetkizý boıynsha jumystardy aıaqtaýy kerek.
Aıta keterligi, jańa balabaqshany paıdalanýǵa berý aýdannyń mektepke deıingi uıymdarynda oryn tapshylyǵyn azaıtýǵa múmkindik beredi. Atap aıtqanda, «Shuǵyla» shaǵyn aýdanynda 7500-den astam adam turatyn 40 kóppáterli turǵyn úı («Álem sıtı» TK qosa alǵanda) bar.
Naýryzbaı aýdanynda barlyǵy 1041 oryndyq 5 memlekettik balabaqsha jáne 6360 oryndyq 120 jeke menshik balabaqsha jumys isteıdi. 2023 jyly aýdanda 1007 oryndyq 17 jeke balabaqsha ashyldy. 2024 jylǵa 1200 oryndyq qosymsha 4 balabaqsha salý josparlanǵan. Olardyń ishinde «Shuǵyla», «Quramys», «Qalqaman-2» shaǵyn aýdandaryndaǵy balabaqshalar bar.
Tekserý qorytyndysy boıynsha Erbolat Dosaev qurylys, bilim basqarmalary basshylarynyń nazaryn balabaqshada búldirshinder úshin barynsha qaýipsiz jáne qolaıly jaǵdaı jasaý maqsatynda jumys sapasyn jaqsartýǵa, tehnıkalyq baqylaýdy kúsheıtýge aýdardy. Qala basshysy jedel joıýdy qajet birqatar olqylyqtar jóninde eskertý jasady. Barlyq jumystardy, sonyń ishinde irgeles aýmaqty abattandyrýdy aǵymdaǵy jyldyń sońyna deıin aıaqtaý tapsyryldy.
Anyqtama:
Almaty balabaqshalaryna kezek 1-6 jas aralyǵynda - 41 065 bala, 3-6 jas aralyǵynda - 16 545 bala. 2 jastan 6 jasqa deıingi balalardy qamtý 74%, 3 jastan 6 jasqa deıin – 94% qurady. Almatyda jalpy 80 561 balany qamtıtyn 951 mektepke deıingi uıym jumys isteıdi, onyń ishinde memlekettik 194, jeke 757, onyń 664-i memlekettik bilim berý tapsyrysyn alady. Almatyda aǵymdaǵy jyldyń basynan beri barlyǵy 290 oryndyq 1 memlekettik balabaqsha jáne 5615 oryndyq 80 jeke menshik balabaqsha ashyldy.