Shrı-Lanka prezıdenti Gotabaıa Radjapaksa Kolomboda táýlik boıy ótken halyq sherýinen keıin otstavkaǵa ketti. Bul týraly keshe parlament spıkeri Mahında Iapa Abeıvardena málimdedi, dep habarlaıdy Almaty-akshamy.kz Inform.kz-ke silteme jasap.
Buǵan deıin el premer-mınıstri Ranıl Vıkramasınghe de «azamattardyń qaýipsizdigi úshin» qyzmetinen ketýge daıyn ekenin málimdegen. Senbi kúni narazylyq bildirgen myńdaǵan adam prezıdent rezıdensıasyn basyp aldy. Tártip saqshylary aspanǵa oq atyp, kózden jas aǵyzatyn gaz qoldandy, biraq halyqty tarata almady. Kem degende 45 adam jaraqat aldy.
«Búgin biz jekpe-jekte jeńiske jettik desem, qatelespeımin. Barlyq kelispeýshilikterdi qoıa turyp, prezıdenttiń úıin basyp aldyq. Biz Gotabaıa Radjapaksa myrzanyń otstavkaǵa ketemin degen málimdemesin kútemiz», - deıdi narazylyq bildirýshilerdiń biri, Kolombo turǵyny Mohamad Imran. Shrı-Lankada 9 shildede sharyqtaý shegine jetken narazylyq sharalary birneshe aıdan beri jalǵasyp keledi.
El turǵyndary úkimettiń buryn-sońdy bolmaǵan ekonomıkalyq daǵdarysqa qarsy qalaı jumys atqaryp jatqanynan narazy: shildede eldegi azyq-túlik ınflásıasy 57%-ǵa jetti – turǵyndar tamaq ishýge aqsha tappaı júr, al janarmaı tapshylyǵyna baılanysty halyq benzın kezeginde birneshe kúnnen turady. Jaǵdaıdyń kúrdeli bolǵany sonsha, memlekettik qyzmetkerlerge bes jylǵa demalys alyp, aralda qalǵan týystaryna aqshalaı kómektesý úshin shetelge kóshý usynylǵan.