Bylaı qarasań, búginde shyǵyp jatqan jańa án kóp. Biraq ilip alary shamaly. Kópshiligi alǵashynda biraz aıtylyp júredi de, artynsha umyt bolady. Al búgin bar, erteń joq arzan dúnıelermen ulttyq estrada deńgeıin qalaı kótermekpiz?
Kári-jastyń júregine birdeı jol tabardaı ómirsheń, shynaıy shyǵarmalar boıynda ulttyq rýh, minez, tabıǵı talant astasyp jatqan daryn ıesinen ǵana týsa kerek. Munyń syrtynda zamanaýı bilim men bilik te asa mańyzdy. Iaǵnı óz qazanymyzda ǵana qaınaıtyn ýaqyt ótti. Mysaly, estrada ónerin nemese shoý-bıznesti zańdy turǵyda negizdep otyrǵan kim? Árıne, Amerıka, Anglıa, Eýropa. Osy oraıda, ónerimizdi dúnıejúzilik deńgeıge kóteremiz desek, bizge olarmen sanaspaýǵa bolmaıdy. Iaǵnı olar qandaı aspapta oınaıdy, qalaı aranjırovka jasaıdy, ony eskerý shart. Bul rette belgili ánshi-kompozıtor Jeńis Seıdolla kezinde:
«Siz qazir orys ánderiniń 99 paıyzynan balalaıkany nemese baıandy kezdestirmeısiz. Biz, kerisinshe, ánderimizdiń 99 paıyzyna dombyrany da, qobyzdy da, bárin-bárin tyqqyshtap tastaǵanbyz. Ras, «MýzArt» pen keıinirek trıo, kvartet bolyp shyqqan jigitterimizdiń birazy ulttyq aspaptardy án-áýenderine jaqsy qoldandy da. Biraq ár nárseniń óz ýaqyty, shegi bar. Álemdik deńgeıge shyǵý úshin bizge endi kóp nárselerdi basqasha oılastyrý kerek», – degen pikir aıtqany bar.
Bir anyǵy, qazirgi ýaqytta qazaq ániniń, jalpy, qazaq óneriniń birden-bir tyńdarmany, tutynýshysy qazaq halqy ǵana bolyp otyr. Endi «Muny ózgertý múmkin be? Basqasha aıtqanda, qaıtkende ulttyq ónerimizdiń órisin keńeıte alamyz?» degenge kelsek, bul aradaǵy másele kásibılik pen sheberlikke baılanysty. Mysaly, halyqaralyq deńgeıdegi aranjırovkamen árlesek, óńdeı alsaq, kez kelgen qazaqsha ándi, tipti halyq ánin de búkil dúnıe júzi tyńdar edi, álemdik deńgeıdegi úlken konkýrstarǵa da qysylmaı qatystyrar edik. Ókinishke qaraı, bizde sondaı mamandardy, ánshilerdi memlekettik deńgeıde arnaıy daıyndaýǵa kóńil bólinbeı otyr. Ras, shoý-bıznesti kóterýge tyrysyp júrgen jeke prodúserler joq emes. Biraq J.Seıdolla aıtpaqshy, qansha tyrysqanymen, báribir olardyń shoý-bıznesi toı-bızneske aınalady. Óıtkeni, olardyń súırelep júrgen Lındasy, «Ordasy», Maqpal Isabekovasy, bári-bári – Qazaqstannyń deńgeıindegi ánshiler. Eger stıldi ózgertpese, aıtyp júrgen ánderine halyqaralyq deńgeıde aranjırovka jasatpasa, odan shyǵa da almaıdy.
Estrada men shoý-bıznestiń halyqaralyq deńgeıge saı ólshemin Anglıa, Amerıka, Eýropa mýzykanttarynan kórýge bolady. Sol sebepti de, ózin «kompozıtormyn» dep esepteıtin árbir adam shet eldiń jaqsy-jaqsy degen ánderin tyńdap, sodan birdeńe úırenýge tyrysýy kerek. Án-áýenimizdi olardyń úzdik aranjırovkasymen baıytyp, ózara úılesim tapqannan utpasaq, utylmaıtynymyz anyq. Bizde jaqsy dybys rejıserleri, aranjırovka jasaıtyn mamandar áli de tapshy. Ánshilerimiz sol úshin birese Máskeýge, birese Tashkentke sabylyp jatady. Bul rette mamandar: «Osyndaı qajetti, zárý mamandyqtar boıynsha jastardy shet elge jiberip, oqytýymyz qajet. Úkimet oǵan qarjy bólýge tıis.
Mysaly, «Bolashaq» baǵdarlamasy boıynsha zańgerlerdi, matematık, fızık, hımıkterdi, jalpy, qanshama adamdy jiberip jatyrmyz! Sonyń ishinde mýzykant ta, pıanıs te, skrıpkashy da ketýge tıis», – degen pikirde. Sol kezde ǵana bizdiń mýzyka kóteriledi, sol kezde ǵana bizdiń mýzykany shet el bile bastaıdy, ózara shyǵarmashylyq baılanys ornaıdy, qarym-qatynas, aralasý bastalady. Sóıtip, mádenıetimiz de, shoý-bıznesimiz de kóteriledi.