Jetisý oblysynyń malshylar qaýymy shopandar kúnin atap ótti
Osylaısha jyl 12 aı boıy mal sońynda júrip, tórt túliktiń sanyn eselep ósirýmen aınalysyp jatqan qarapaıym eńbek adamdaryna Shaǵan taýynyń baýraıynda qurmet kórsetildi, dep habarlaıdy Almaty-akshamy.kz 24.kz-ke silteme jasap.
Onda qazaqtyń ulttyq oıyndary oınalyp, úzdik malshylar marapattaldy. Sondaı azamattardyń biri Qabdolda Jamaýbaev. Qolyna quryq ustap, 40 jyl boıy jylqy baqqan ol, búginde etti-júndi baǵyttaǵy merınos qoı tuqymyn ósirýmen aınalysady. Qojalyǵyndaǵy qoı sany myń basqa jetken.
«Biz úshin shopandar toıy bir jyldyń esebi ispetti. Qystan aman-esen shyǵyp, malymyzdy tóldetip, jaılaýǵa kóshtik. Osyny umyt qaldyrmaı elep eskerip, Shaǵan taýynyń eteginde, shopandar toıyn uıymdastyrǵan Kóksý aýdanynyń azamattaryna aıtar alǵysym sheksiz», – deıdi sharýa qojalyǵynyń jetekshisi Qabdolda Jamaýbaev.
Shopandar toıy bul ólkede sońǵy ret 2012 jyly atalyp ótipti. Mine arada 10 jyldan astam mereke qaıta jalǵasty. Shara barysynda úzdik shopandarǵa baǵaly syılyqtar tabys etildi.
- Atam baqty, ákem baqty. Ózim baqtym. Júz jylǵa kelip tur. Keıinnen endi jylqy sándik, qoı baılyq degen bar. Qoıǵa aýysyp kettik. Qoıdyń sharýasymen ary qaraı júrip jatqan jaıymyz bar. Bala-shaǵa, aǵaıyn týys bárin asyrap. Shopandar toıy óte jaqsy. Aýdannyń ákimderine, jigitterdiń barlyǵyna raqmet!-dep rızashylyǵyn bildirdi Qabdolda Jamaýbaev.