SHOB damytý jáne megapolıs kásipkerlerine qandaı qoldaý sharalary kórsetilýde, bul týraly Almaty qalasy kásipkerler palatasy tóraǵasynyń mindetin atqarýshy Narıman Ibragımov Óńirlik komýnıkasıalar qyzmetiniń alańynda baıandady, dep habarlaıdy Almaty-akshamy.kz.
Brıfıń barysynda spıker Almatyda Kásipkerlerge qyzmet kórsetetin kópfýnksıonaldy ortalyqtyń iske qosylǵanyn, onda memlekettik, banktik, servıstik jáne qarjy ınstıtýttarynyń qyzmetterin qosa alǵanda, zańdy tulǵalarǵa arnalǵan 800-den astam túri kórsetiletinin aıtty. Osyǵan uqsas eki ortalyq elorda men Shymkent qalasynda pılottyq rejımde jumys istep jatyr.
"Almatyda kásipkerler jańa ortalyqtyń múmkindikterin synap jatyr. Shaǵyn jáne orta kásipkerliktiń ósýi boıynsha jyl saıyn Almaty qalasy Qazaqstanda birinshi oryn alady. Búginde megapolıste 380 myńǵa jýyq SHOB sýbektisi tirkelgen. Onyń ishinde jumys istep turǵan shaǵyn jáne orta bıznes sýbektileri – 323 myńnan astam. Bul 2022 jylmen salystyrǵanda 39% joǵary. Endi olardyń barlyǵy jańa Kásipkerlerge qyzmet kórsetetin kópfýnksıonaldy ortalyqta “bir tereze” qaǵıdaty boıynsha qyzmet ala alady", - dedi N. Ibragımov.
Ol sondaı-aq Kásipkerlerge qyzmet kórsetýdiń kópfýnksıonaldy ortalyqtaryn búkil el aýmaǵynda ashý josparlanǵanyn aıtty. Jobanyń basty maqsaty – bıznesti qalyptastyrýdyń barlyq kezeńinde: ıdeıadan bastap jobany tolyq iske asyrýǵa deıin bıznes pen kásipkerlik bastamasy bar qazaqstandyqtardy keshendi súıemeldeý.
Kásipkerler palatasynyń negizgi qyzmeti men mindeti – bıznestiń quqyǵy men múddelerin qorǵaý. Ótken jartyjyldyqta osy baǵytta kásipkerlerge jan-jaqty quqyqtyq keńes berý máseleleri kóterildi, dep atap ótti spıker.
"Kelýshilerdiń negizgi quqyqtaryn muqıat jáne saýatty túsindirý nátıjesinde 2022 jyldyń uqsas kezeńinde resmı ótinishter sanyn 123-ten 82-ge deıin tómendetýge qol jetkizildi. 2023 jyldyń birinshi jartyjyldyǵynda keńestiń 10 otyrysy ótkizildi. 22 Problemalyq másele qaraldy. Barlyq suraqtar aýqymdy jáne jeke sóıleýdi talap etedi", - dep qosty ol.
Sondaı-aq, Almatyda sybaılas jemqorlyqqa qarsy qyzmetpen birlesip uıymdastyrylǵan “Bızneske jol” jáne “Sybaılas jemqorlyqqa qarsy volonterlik” jobalary aıasynda kásipkerlerge tegin quqyqtyq kómek kórsetý boıynsha aksıasy ótti.
Kásipkerlerge yńǵaıly bolý úshin memlekettik organdardyń basshylary men bilikti zańgerler 268 bıznes sýbektisi ornalasqan "FORUM" saýda-oıyn-saýyq ortalyǵynda keńes berdi.
2021-2025 jyldarǵa arnalǵan kásipkerlikti damytý jónindegi ulttyq joba sheńberinde 2023 jyldyń qańtar-sáýir aılary aralyǵynda 2720 qyzmet kórsetildi, onyń ishinde 2509 biregeı klıent, sonymen qosa 1917 JK jáne 161 JSHS.
Sonymen qatar, kásipkerlik áleýetin damytý maqsatynda eki baǵytta “Men kásipker” quraly iske asyrylýda:
1) kásipkerlik áleýetti arttyrý maqsatynda quzyretterdi oqytýdy jáne beıindik oqytýdy qamtıtyn “Kásipke baǵyt”;
2) áıelder kásipkerligin damytý ortalyqtary.
Bul qural kásipkerlik bastamany iske asyrýshylarǵa, sondaı-aq shaǵyn jáne orta kásipkerlik sýbektilerine óteýsiz negizde usynylady.
“2022 jyly áıelder kásipkerligin damytý ortalyqtarynda 609 qyzmet kórsetildi. Kásipkerlik qyzmetti odan ári damytý úshin qala áıelderine arnalǵan kýrstardyń qajettiligin anyqtaý boıynsha jumystar júrgizilýde. “Kásipke baǵyt” aıasynda kásipkerler qajettilikteri anyqtalyp, onyń negizinde beıindi oqytý jumystaryn júrgizetin qyzmet kórsetýshiler izdelýde”, - dep túıindedi sózin N. Ibragımov.