Osy jyldyń birinshi qyrkúıeginen bastap shákirtaqy ósedi.
Bul týraly Ǵylym jáne joǵary bilim mınıstrliginiń Joǵary jáne joǵary oqý ornynan keıingi bilim komıteti habarlaǵan.
2021-2025 jyldarǵa arnalǵan jol kartasyna sáıkes, stıpendıa eki esege ulǵaıtylady. Bul rette esepteýler kezinde bazalyq stıpendıa úshin 2020 jylǵy shákirtaqylardyń mólsheri esepke alynady. Mysaly, bakalavrlarda bul soma 26 186 teńgeni quraǵan demek osy soma jyl saıyn 20 paıyzǵa artady, dep habarlaıdy Almaty-akshamy.kz.
"Osyǵan uqsas esepteý tetigi Densaýlyq saqtaý mınıstrligi men Nazarbaev Ýnıversıtetiniń stıpendıalaryn qospaǵanda, magıstratýrada da, doktorantýrada da qoldanyldy", – dep naqtylady komıtet.
Belgili bolǵandaı:
- bakalavrlarǵa – 20 paıyzǵa (41 898 teńgeden 47 135 teńgege deıin, al pedagogıka baǵytynda oqıtyndarǵa 67 200 teńgeden 75 600 teńgege deıin);
- magıstranttar men doktoranttarǵa – 15 paıyzǵa (97 024 teńgeden 107 061 teńgege deıin, doktoranttarda tıisinshe 217 500 teńgeden 240 000 teńgege deıin).
Jol kartasyn iske asyrý úshin qazirgi ýaqytta Úkimet qaýlysynyń jobasy ázirlendi. Qujatqa sáıkes, 2024 jyldyń qyrkúıeginen bastap shákirtaqylar bylaı ulǵaıady:
- joǵary bilim berý baǵdarlamalaryn iske asyratyn bilim berý uıymdarynda oqıtyn stýdentterge, daıarlaýdyń pedagogıkalyq baǵyttary jáne "Densaýlyq saqtaý" baǵyty boıynsha oqıtyn stýdentterdi qospaǵanda – 41 898 teńgeden 47 135 teńgege deıin;
- joǵary bilim berý baǵdarlamalaryn iske asyratyn bilim berý uıymdarynda daıarlaýdyń pedagogıkalyq baǵyttary boıynsha oqıtyn stýdentterge – 67 200-den 75 600 teńgege deıin;
Joǵary bilim berý baǵdarlamalaryn iske asyratyn bilim berý uıymdarynda "Densaýlyq saqtaý" daıarlaý baǵyty boıynsha oqıtyn stýdentterge – 67 200-den 75 600 teńgege deıin;
- ınternderge – 75 890 teńgeden 85 376 teńgege deıin;
- magıstranttarǵa – 97 024 teńgeden 107 061 teńgege deıin;
- doktoranttarǵa – 217 500 teńgeden 240 000 teńgege deıin;
- "Densaýlyq saqtaý" daıarlaý baǵyty boıynsha oqıtyn doktoranttardyń shákirtaqysy – 217 500 teńgeden 240 000 teńgege deıin;
- "Densaýlyq saqtaý" daıarlaý baǵyty boıynsha rezıdent dárigerler men magıstranttarǵa – 111 579 teńgeden 123 122 teńgege deıin.
Komıtet atap ótkendeı, osy jyldyń búdjetinde stıpendıalardy ulǵaıtýǵa qarajat tolyq kólemde josparlanǵan. Ósim esebinen 180 myńnan astam stýdenttiń tabysy artady.