15-qyrkúıekte Qazaqstanda dástúrli emhanaǵa tirkeý naýqany bastalady. Shetel azamattary bul múmkindikti paıdalana ala ma, olar emhanaǵa qalaı tirkeledi? Bul týraly Ortalyq komýnıkasıalar qyzmetinde ótken brıfıńte Medısınalyq saqtandyrý qorynyń Almaty qalalyq fılıaly dırektory Tileýhan Ábildaev aıtyp berdi, dep habarlaıdy almaty-akshamy.kz
Tileýhan Ábildaevtyń sózine súıensek, kampanıa barysynda qazaqstandyqtarmen birge Eýrazıalyq ekonomıkalyq odaq elderinen kelgen eńbek mıgranttary men olardyń otbasy músheleri de emhanaǵa tirkele alady.
«Bıyl sheteldik eńbek mıgranttaryn emhanaǵa tirkeý tártibi ózgerdi. Endi olar emhanaǵa erikti medısınalyq saqtandyrý nemese júktelgen medısınalyq saqtandyrý kelisimsharty arqyly ǵana tirkele alady. Bul polıster arqyly olar bastapqy medısınalyq-sanıtarlyq kómek qyzmetin paıdalana alady», - dedi fılıal basshysy.
Sheteldik eńbek mıgranttary E-gov arqyly tirkele almaıdy. Tirkelý úshin emhana basshysynyń atyna qazaq nemese orys tilinde erkin túrde ótinish jazylady. Ótinishpen birge pasport, erikti nemese júktelgen medısınalyq saqtandyrý polısi qosa beriledi.
Elimiz boıynsha atalǵan kelisimsharttardy 7 jeke menshik saqtandyrý kompanıasy arqyly rásimdeýge bolady. Olar: «Intertıch» SK, «Bazel» SK, «Nomad» SK, «Frıdom ınshýrans» SK, «Sentras Inshýrans» SK, «NSK» SK, «Bazel» SK.
«Tirkelgennen keıin eńbek mıgranttary MÁMS paketindegi qyzmetterdi paıdalana alady. Mysaly, qajetti konsýltatıvtik-dıagnostıkalyq qyzmetter, josparly stasıonarlyq kómek, medısınalyq ońaltý syndy taǵy da basqa kómek túrleri qoljetimdi bolady», - dedi Tileýhan Ábildaev.
Eńbek mıgranttarynyń ózderi MÁMS júıesine jumys berýshi tarapynan jasalǵan jarnalar men aýdarymdar arqyly qatysady. Al, 18 jasqa tolmaǵan balalary memleket tarapynan saqtandyrylsa, olardyń jubaılary (zaıyby) ózin-ózi saqtandyrýshy retinde aldaǵy 12 aıǵa jarna tóleýi qajet.
Esterińizge sala ketsek, Qazaqstanda turaqty turatyn, yqtıarhaty bar sheteldikter el azamattarymen birdeı quqyqtarǵa ıe. Olar emhanaǵa burynǵysha kedergisiz tirkele alady.
Al, Eýrazıalyq Odaqqa kirmeıtin elderdiń azamattary emhanaǵa tirkele almaıdy jáne MÁMS qyzmetin paıdalanbaıdy, medısınalyq kómek olarǵa tek aqyly túrde kórsetiledi.