15 qyrkúıekten bastap Qazaqstanda jyl saıyn emhanalarǵa tirkelý naýqany bastalady.
Almaty qalasy Qoǵamdyq densaýlyq saqtaý basqarmasynyń emdeý-profılaktıkalyq qyzmet jáne monıtorıń, taldaý, sıfrlandyrý jáne memlekettik qyzmetter bóliminiń basshysy Láılá Imanǵalıeva 15 qarashaǵa deıin almatylyqtar qalaı jáne qaıda tirkelýi múmkin ekenin aıtty, dep habarlaıdy Almaty-akshamy.kz.
Óńirlik komýnıkasıalar qyzmetiniń brıfıńinde habarlanǵandaı, Almatyda 76 alǵashqy medısınalyq-sanıtarlyq kómek uıymy jumys isteıdi, onyń 40-y memlekettik jáne 36-sy jeke menshik nysandy. Olardyń barlyǵy TMKKK jáne MÁMS sheńberinde qyzmet kórsetedi.
Eki ádispen tirkelýge bolady: birinshi ádis - alǵashqy medısınalyq-sanıtarlyq kómek uıymyna tikeleı habarlasý, ekinshi ádis – «Elektrondyq úkimettiń» veb-portaly arqyly.
Aıta ketý kerek, pasıentterge jylyna bir retke deıin erkin tańdaý quqyǵy boıynsha naýqannan tys emhanaǵa tirkelý múmkindigi beriledi. Sondaı-aq, jumys nemese oqý orny kóshken jáne aýysqan jaǵdaılarda, sondaı-aq medısınalyq mekeme taratylǵan nemese qaıta uıymdastyrylǵan kezde.
Jeke tulǵalardy MSAK uıymdaryna bekitý MSAK kórsetý úshin negiz bolyp tabylady jáne qaǵıdattarda júzege asyrylady:
- otbasylyq qyzmet kórsetý prınsıpi;
- MSAK aýmaqtyq qoljetimdiligi;
- MSAK aýmaqtyq qoljetimdiligi sheginde medısınalyq uıymdy erkin tańdaý;
- pasıenttiń medısınalyq kómektiń sapasyna qanaǵattanýy;
- menshik nysanyna jáne vedimistik baǵynystylyǵyna qaramastan teń quqyly jáne adal básekelestik.
Eńbek mıgranttaryn tirkeýge keletin bolsaq, İshki ister organdary beretin ýaqytsha turýǵa ruqsat qujat qajet.
«Bul qujatta sheteldiktiń bolý merzimi kórsetiledi, dál osy merzimge medısınalyq uıym eńbek mıgranttaryn bekitedi. Tirkeýge suraý salý durys jasalǵan kezde kórsetilgen merzim ótkennen keıin sheteldik uıymnan avtomatty túrde tirkeýden shyǵarylady», - dep túsindirdi L.Imanǵalıeva.
Tirkeý naýqany tek ÁMS qorynyń derekter bazasynda tirkelgen medısınalyq uıymdar arasynda júzege asyrylady. Qordyń https://fms.kz/kz/ saıtynda tirkelýge bolatyn emhanalar tizimimen tanysýǵa bolady.