Ózgerister 14 tamyzdan bastap kúshine endi.
Medısınalyq saqtandyrý qorynyń Almaty qalalyq fılıalynyń málimetinshe, endi eńbek mıgranttary medısınalyq saqtandyrý polısi nemese júktelgen medısınalyq saqtandyrý kelisimsharty arqyly ǵana tirkele alady, dep habarlaıdy Almaty-akshamy.kz
Eńbek zańnamasyna, Halyq densaýlyǵy men densaýlyq saqtaý júıesi týraly kodekske engizilgen ózgeristerge sáıkes, ımıgranttardy emhanalarǵa tirkeý jáne olarǵa medısınalyq kómek kórsetý tártibi ózgerdi. Bul ózgerister tek Reseı, Belarýs, Qyrǵyzstan, Armenıa múshesi bolyp tabylatyn EAEO elderiniń azamattaryna qatysty.
Jańa tártip boıynsha atalǵan shetel azamattary emhanaǵa erikti medısınalyq saqtandyrý (EMS) nemese júktelgen medısınalyq saqtandyrý (JMS) kelisimsharty negizinde tirkeledi. Kelisimsharttar bastapqy medısınalyq-sanıtarlyq kómek (emhana) pen shuǵyl medkómek shyǵyndaryn jabýǵa arnalǵan bolýy tıis. Kelisimshart merzimi bitken kezde mıgrant medısınalyq uıym tirkeýinen avtomatty túrde shyǵarylady.
Tirkelý úshin emhana basshysynyń atyna qazaq nemese orys tilinde erkin túrde ótinish jazý qajet. Ótinishpen birge jeke kýálik (pasport), EMS nemese JMS polısi qosa beriledi. Ótinish berýshi medısına mekemesine óz betinshe júgine alady nemese ony saqtandyrý kompanıasy tirkeıdi. Tirkeletin emhanalar tizimi sharttyń qosymshasynda (EMS nemese JMS) kórsetilýi tıis.
EAEO týraly kelisimshartta sheteldikterdiń densaýlyq saqtaý salasyndaǵy quqyǵy ǵana emes, mindetteri de jazylǵan. Olardyń qataryna aýrýlardy erte anyqtaý úshin profılaktıkalyq skrınıngterden ýaqtyly ótý, áıelderdi júktilik boıynsha ýaqtyly esepke qoıý (12 aptaǵa deıin), sozylmaly jáne áleýmettik mańyzy bar aýrýlardy dınamıkalyq baıqaý jáne t.b. kiredi. Sondaı-aq, Qazaqstanda ýaqytsha turatyn sheteldikter aınalaǵa qaýip tóndiretin aýrýlar kezinde kórsetiletin medısınalyq kómekti qospaǵanda, respýblıkanyń turaqty turǵyndaryna ǵana kórsetiletin tegin medısınalyq kómektiń kepildik berilgen kólemi (TMKKK) paketindegi qyzmetterdi paıdalana almaıdy.
Al, QR azamattary, qandastar jáne QR aýmaǵynda turaqty turatyn sheteldikter úshin emhanaǵa tirkelý tártibi ózgergen joq.
Emhanalar tizimimen Qordyń www.fms.kz saıtyndaǵy «Emhanany tańdaý» bólimi arqyly tanysýǵa bolady.