Qazaqstan Respýblıkasy Syrtqy ister mınıstrligi, Bas redaktorlar klýby, Kazakh Tourism ulttyq kompanıasy jáne Azıadaǵy ózara is-qımyl jáne senim sharalary jónindegi keńes Hatshylyǵy (AÓSSHK) birlesip ótkizip jatqan 8-shi jyl saıynǵy «Qazaqstan sheteldik BAQ kózimen» atty baıqaýyna qatysýǵa 40 elden 70-ten astam jýrnalıs ótinim bergen.
Álemniń bes qurlyǵynan jınalǵan jýrnalıser men blogerler halyqaralyq qatynastar, tarıh, mádenıet, týrızm, bilim, ınvestısıalyq áleýet, ulttyq taǵamdar jáne basqa da taqyryptardy qamtıtyn baspa jáne elektrondy basylymdarda, tanymal ınternet-platformalarda, blogtarda, sondaı-aq podkast túrinde jaryq kórgen shyǵarmashylyq jumystaryn tanystyrdy, dep habarlaıdy Almaty-akshamy.kz.
Syrtqy ister mınıstriniń orynbasary Roman Vasılenko, Bas redaktorlar klýbynyń prezıdenti Bıbigúl Jeksenbaı, Kazakh Tourism Basqarma tóraǵasy Talǵat Amanbaev jáne AÓSSHK áskerı-saıası ólshem sarapshysy Elshi Dýlat Qýanyshev kirgen qazylar alqasy konkýrstyń nátıjesin qorytyndylady.
Álemniń túrli aımaqtary men nomınasıalary boıynsha 8 sheteldik avtor konkýrstyń jeńimpazy atandy:
Soltústik jáne Ońtústik Amerıka aımaǵy boıynsha Qazaqstandaǵy joǵary bilim, taý-ken ónerkásibin transformasıalaý jáne elimizdi sheteldik ınvestorlar aldynda tartymdy etý taqyrybyndaǵy Canada Eurasia Chamber of Commerce (CECC) podkasttar serıasy úzdik dep tanyldy.
Eýropa elderiniń ishinde ıspandyq jýrnalıs Hose Pýglısıdiń jumysy eń kórnekti dep tanyldy. Ol Iberıa túbeginde ǵana emes, Latyn Amerıkasy elderinde de oqylatyn «Periodista Digital» basylymynda jarıalanǵan Qazaqstannyń álemdik arenadaǵy pozısıasyn nyǵaıtýǵa arnalǵan maqalasyn usyndy.
«TMD jáne Eýrazıa» nomınasıasynda «Uzdaily.uz» tilshisi Askar Iakýbovtyń Ózbekstan men Qazaqstan arasyndaǵy yntymaqtastyq taqyrybyna arnalǵan maqalalar toptamasy úzdik dep tanyldy.
Azıa – Tynyq muhıty aımaǵy boıynsha «The Voice of Vietnam» ulttyq radıosynyń tilshisi Ngýen Fan Hýong Sýannyń Qazaqstan tarıhy jáne ekijaqty yntymaqtastyqty damytý taqyryptaryndaǵy birqatar jumystary atap ótildi.
Taıaý Shyǵys pen Afrıka elderi arasynda qazylar alqasy efıopıalyq reporter Gosaı Feııssa Nateıdiń birqatar maqalalaryn joǵary baǵalady. Qurlyqtyń 54 memleketin biriktiretin Afrıka memleketteri odaǵynyń shtab-páteri Addıs-Abebada ornalasýy da Konkýrstyq komısıanyń sheshimine áser etti.
Kazakh Tourism nomınasıasy boıynsha ıtalándyq saıahatshy-bloger Fılıppo Tentıdiń Qazaqstannyń mádenıeti men týrısik oryndary týraly «Álem Overlend kózimen» atty derekti fılmi jeńiske jetti. Bul fılm 2023 jylǵy qańtarda Italıanyń «RAI» bas teledıdarynda kórsetildi.
Bıyl Qazaqstannyń AÓSSHK-te tóraǵalyq etýine oraı alǵash ret AÓSSHK tarapynan jeke nomınasıa engizildi. Qazylar alqasy «Kazakhstan's Unwavering Commitment In Promoting International Peace, Security» maqalasy úshin «Bernama» agenttigi halyqaralyq bóliminiń redaktory malaızıalyq Ravıchandran Radjamanıkam, sondaı-aq «AÓSSHK: Jańa álemdegi jańa Azıa – Ázerbaıjannyń kózqarasy» maqalasy úshin Nargız Mamedovany jeńimpaz dep tanydy.
Buryn habarlanǵandaı, baıqaý jeńimpazdary aǵymdaǵy jyldyń tamyz aıynda Qazaqstanǵa uıymdastyrylatyn sapar sheńberinde Astana, Almaty jáne Shyǵys Qazaqstan oblystaryna saıahattaýǵa múmkindik alady.
Óz jumysyn 2014 jyly bastaǵan «Qazaqstan sheteldik BAQ kózimen» jyl saıynǵy baıqaýy sheteldikterdiń elimizdiń damýynyń ózekti úrdisterine, onyń baı tabıǵı jáne mádenı murasyn dáripteý, sondaı-aq búkil álemnen sheteldik ınvestorlar men týrıserdi tartý úshin onyń áleýetin ashýǵa baǵyttalǵan.