Osydan biraz ýaqyt buryn jumysqa barý degen siz úshin meıramǵa, toıǵa barýmen para-par edi. Sol úshin ádemi kıinip, erekshe daıyndalatynsyz. Al, qazir... Qazir jumys dese alǵa basqan aıaǵyńyz keri ketip, júıkeńiz syr berip júr. Munyń sebebi nede? Keshe janǵa qýanysh syılaǵan jumysyńyz búgin nege kóńilińizdi jabyrqatady?
Bastapqyda jumystaǵy jaǵdaıdyń bári sizge qyzyq, bári qupıa bolatyn. Mine, osy jumbaqty sheship, jetistikke jetý úshin alǵa umtylatyn edińiz. Ýaqyt ótti. Keshe asyǵyp jetetin, sheshýge jantalasa kirisetin sharýalardyń barlyǵy búginde qarapaıym tirlikke aınalǵan. Mundaı jaǵdaıdy mamandar kareralyq tuıyqqa tirelý nemese kúızelistiń bastalýy dep baǵalaıdy. Eger mundaı jaǵdaıdy ózińizden baıqasańyz, onda tyǵyryqtan shyǵatyn joldy tezirek izdegenińiz durys.
Jumysqa degen yqylasyńyzdyń joǵalǵanyn baıqadyńyz ba, onda arqany keńge sozyp júre berýdiń keregi joq. Birden demalys alyńyz. Qyzmettegi barlyq baılanystan ózińizdi shettetip, kıim-keshegińizdi jınańyz da birden demalys ornyna jol tartyńyz. Eger sizdegi kúızelis jumystan jalyqqannan emes, sharshaǵannan bolsa demalystan keıin jaǵymsyz áserdiń bári artta qalady. Al eger demalystan keıin de jumysqa zaýqyńyz bolmaı, aınalańyzdaǵynyń barlyǵy qyzyqtyrmaıtyn bolsa onda basqa tásil izdegenińiz durys. Sonda tyǵyryqtan shyǵýǵa neniń kómektesýi múmkin? Barlyǵy sizdiń jumysqa degen yqylasyńyzdyń ózgerýine ne sebep bolǵanyna baılanysty.
- Kásibińizdiń jalyqtyrýy. Buǵan deıin sizge mańyzdy, qyzyqty kóringen dúnıeler qazir óz mánin joǵaltqan. Ne isteý kerek? Ózińiz atqaratyn sharýalar sheńberin keńeıtip, jumys tártibine biraz ózgerister engizińiz. Basshymen sóılesip, ózińizge burynǵydan kúrdelirek, kóbirek jumys berýdi surańyz nemese artyq jumysty óz erkińizben-aq tyndyra berińiz. Ýaqytty paıdaly ári qyzyqty ótkizýdiń amaly jeterlik. Aıtalyq, bilim jetildiretin kýrstarǵa baryńyz, qosymsha kásip meńgerińiz, trenıńterge qatysyńyz. Qandaı kezde de basshylyq izdenimpaz mamannan qol úzip qalǵysy kelmeıdi. Budan keıin de jaǵdaı ózgermese, amal joq, jumysty aýystyrýǵa týra keledi.
Buǵan beıim top: kásibı biliktiliktiń jalyqtyrýy kez kelgen jannyń basynan ótedi. Ásirese, shyǵarmashylyq adamdary, kópshilikpen jumys isteıtin mamandar bul máselemen jıi betpe-bet keledi.
- «Ósýge» úmittiń joqtyǵy.
Mine, bir orynda qansha jyldan beri taban aýdarmaı adal jumys istep kele jatsań da basshylyq tarapynan seniń eńbegińdi baǵalap ósireıin, jalaqyńdy kótereıin degen nıet baıqalmaıdy.
Ne isteý kerek? Eń aldymen bul kompanıaǵa qanshalyqty eńbegińiz sińgenin oısha tarazylap kórińiz. Eger tyndyrǵanyńyz kóp bolsa onda oıyńyzdy jınaqtap, basshylyqqa talap qoıa bilińiz. Eń bastysy, bastyqqa kirer aldynda jaqsylap daıyndalyńyz. Naqty derekter, senimdi aıtylǵan sóz – sizdiń eń basty qarýyńyz ekenin esten shyǵarmańyz. Al, basshylyq sózińizdi júre tyńdap, talabyńyzǵa kóńil aýdarmasa jumys aýystyrǵannan basqa amal joq.
Buǵan beıim top: ári qaraı keńeıýdi, úlkeıýdi maqsat etpeıtin shaǵyn kompanıa qyzmetkerleri
- Kásipke kóńil tolmaýshylyq.
Kúnderdiń kúninde siz ózińizge múlde jat, tabıǵatyńyzben sáıkes kelmeıtin kásippen aınalysyp júrgenińizdi baıqaısyz. Mundaıda ne istegen durys? Árıne, bulaı ókinbes úshin sizge mamandyq tańdaǵan kezde jaqsylap oılanyp, asyǵystyq jasamaý kerek edi. Al, endi 16-17 jyl ótip ketkennen keıin oılanýdyń máni bar ma? Desek te, qansha ýaqyt ótse de ózgeristen qoryqpańyz. Jasyńyz orta jastan assa, árıne, kásipti ózgertý asa qolaıly bola qoımaıdy. Biraq basshy jalaqyny da tómendetip, qyzmette de kótermeleýdi umyt qaldyrsa, shamańyz keletin, ózińiz qyzyǵatyn basqa jumystardy aqyryndap meńgere bastaǵanyńyz durys. Sheginetin nesi bar? Sizdiń jumys tájirıbeńiz mol. Bul – eń basty artyqshylyǵyńyz. Sondaı-aq, kópten beri ózińiz hobbıge aınaldyryp júrgen isińizdi de kásip etip, pul tabýyńyzǵa bolady. Keıde osy qyzyǵatyn isińizge birshama ýaqyt bólýdiń ózi ómirińizdi mándi ete túsedi. Al endi jas bolsańyz áńgime bólek. Kúsh-qýatyńyz boıyńyzda, sizge artqa sheginýdiń reti joq. Ózińizdi barlyq kásipte synap kórińiz. Kóńilińizdegini tapsańyz isińiz de ónimdi bolmaq.
Buǵan beıim top: kásibi boıynsha ózin kórsete almaǵan, boıyndaǵy qabiletin asha almaǵan adamdar.
R.S. Jalpy, bir orynda otyryp qalmaı, 5-6 jyl saıyn jumys ózgertip otyrý toqyrap qalýdan saqtaıdy. Ári jańa jumystyń jańa ózgeris, úmit syılary anyq.
Daıyndaǵan Roza QURMANBAI.