Bakterıalardy zerthana saraptamasynyń qorytyndysy rastaǵan.
QR ASHM Agroónerkásiptik keshendegi memlekettik ınspeksıa komıtetiniń tóraǵasy Almabek Marsuly shetelden aýyl sharýashylyǵy ónimderimen birge keletin zıankesterge tosqaýyl qoıý qadamdaryn aıtty, dep habarlaıdy almaty-akshamy.kz
«2021 jyly karantındik fıtosanıtarıalyq baqylaý júrgizý kezinde ósimdikter karantıni salasynda 5 myńnan astam zań buzýshylyq anyqtaldy. Nátıjesinde, 392 mln teńge ákimshilik aıyppul salyndy. Ósimdikter karantıni salasyndaǵy zańnamany buzǵany úshin komıtet eksporttaýshy elderge karantınge jatqyzylǵan ónimdi jetkizý kezinde biryńǵaı karantındik fıtosanıtarıalyq talaptaryn buzý týraly 792 notıfıkasıa jiberdi», - dedi Almabek Marsuly Ortalyq komýnıkasıalar qyzmetinde.
Osy oraıda onyń negizgi úlesi Reseıge tıesili. Odan keıingi oryndarda Ózbekstan, Iran, Túrikmenstan elderi tur. Sonyń arasynda 168 notıfıkasıa karantındik obektilerdiń anyqtalýyna baılanysty jiberildi. Bul organızmder respýblıka aýmaǵyna ákelý kezinde anyqtalyp otyr, bul rette 3 myń tonnadan astam júk qamtyldy.
«2021 jylǵy qańtarda komıtet qyzanaq jáne buryshqa karantındik baqylaý júrgizý kezinde 17 jaǵdaıda Ázirbaıjannan kelgen jáne 19 jaǵdaıda Túrikmenstannan kelgen qyzanaqtarda qońyr qatparly vırýs anyqtaldy. Osyǵan baılanysty Ázirbaıjan men Túrikmenstan aýmaǵynan qyzanaq ákelýge ýaqytsha tyıym salynyp, karantındik fıtosanıtarıalyq is-sharalar engizildi», - dedi ol.
Komıtet basshysynyń aıtýynsha, bıylǵy sáýir aıynda karantındik fıtosanıtarıalyq baqylaýdy júzege asyrý kezinde Germanıadan, Nıderlandydan 228 tonna tuqymdyq kartoptan, sondaı-aq kartoptyń «Zebra Chıp» karantındik obektisimen zalaldanǵan Fransıadan 46,4 kılogramm sábiz tuqymyn ákelý toqtatyldy. Bakterıalar zerthana saraptamasynyń qorytyndysymen rastaldy.
«Joǵaryda kórsetilgen «Zebra Chıp» karantındik obektisin anyqtaý faktileri boıynsha tıisti karantındik qujattar resimdeldi. Ósimdikter karantıni salasyndaǵy zańnamany buzýǵa qatysty ákimshilik materıaldar sot qaraýyna jiberildi. Sot qaýlysynda karantınge jatqyzylǵan ónimniń zalaldanǵan partıasyn tárkileý jáne júk ıelerine ákimshilik aıyppul salý túrinde tıisti sharalar qabyldandy», - dedi ol.