«Ata joly» kartasymen shet elden 50 qandasymyz keledi.
Uzaq merzimdi jańa ınvestorlyq vıza túri engizilip jatyr. Bul týraly Úkimet otyrysynda Kóshi-qon saıasaty tujyrymdasyn iske asyrý barysyn talqylaý kezinde Premer-Mınıstrdiń orynbasary–Eńbek jáne halyqty áleýmettik qorǵaý mınıstri Tamara Dúısenova aıtty, dep habarlaıdy Almaty-akshamy.kz QazAqparatqa silteme jasap.
«Kóshi-qon saıasaty tujyrymdamasynyń negizgi baǵyttary aıasynda iske asyrylyp jatqan negizgi jumystarǵa toqtalaıyn. Birinshi baǵyt – bilim ımıgrasıasy. Memleket basshysy Qazaqstandy akademıalyq turǵydan utqyr jáne jetekshi ǵalymdar men mamandarǵa tartymdy óńirlik habqa aınaldyrý máselesin tapsyrǵan. Osy oraıda zamanaýı kampýstary, ǵylymı zerthanalary bar salalyq ýnıversıtetter ashý úshin keshendi jumys júrgizilip jatyr. Keıingi 2 jylda Qazaqstannyń joǵary oqý oryndarynyń bazasynda shetel joǵary oqý oryndarynyń 6 fılıaly quryldy. Nátıjesinde, bıyl sheteldik stýdentterdiń úlesi barsha stýdentterdiń 4,4 paıyzyna deıin artty», - dedi T. Dúısenova.
Sonymen qatar ol ekinshi baǵyt elimizdiń ınvestısıalyq tartymdylyǵyn arttyrý úshin naqty sharalar qabyldaýǵa arnalǵannyn aıtty.
«Qazir A-5 sanatyndaǵy ınvestorlar Shetelden jumys kúshin tartý úshin ruqsat almaıtyn boldy. Jyl basynan beri 76 shetel azamatyna osyndaı ınvestor vızasy berildi (2022 jyly-95 vıza). Áleýetti ınvestorlarǵa sheteldegi mekemelerimizden «bir ótinish» qaǵıdaty boıynsha Jeke sáıkestendirý nómirin jáne Elektrondy sıfrly qoltańba berý rásimi jeńildetildi. Budan bólek, ınvestor-bıznesmenderdiń ınvestısıalyq vıza alýyna qajet tómengi shekti azaıtý qarastyrylyp otyr. A-6 dep atalatyn uzaq merzimdi jańa ınvestorlyq vıza túri engizilip jatyr. Mundaı vıza ıelerine elimizdiń aýmaǵynda turaqty turý úshin (10 jylǵa) yqtıarhat alý quqyǵy beriledi», - dedi vedomstvo basshysy.
«Al shetelde tabysty bıznesteri bar etnostyq qazaqtar úshin «Ata joly» kartasyn berý tártibi bekitildi. Búginde «Otandastar» qory qolynda kásibi bar, elge «Ata joly» kartasy aıasynda keletin shet eldik 50 qandasymyzdy anyqtap, tıisti is-sharalardy atqaryp jatyr», - dedi mınıstr.
Atap aıtqanda, «Ata joly» kartasy – etnıkalyq qazaqtarǵa elimizde bıznes-keısterin iske asyrýǵa jáne elde tapshy mamandardyń qyzmet etýine beriletin qujat. Karta ıelerine respýblıka aýmaǵynda azamattyqtaryn saqtaı otyryp, 10 jylǵa deıin turaqty turýǵa ruqsat etiledi.