Qazaqstannyń 4 azamaty Mánma elinde quldyqta bolǵan.
Olar Syrtqy ister mınıstrliginiń aralasýymen, elge qaıtaryldy, dep habarlaıdy aqshamnews.kz El.kz aqparat agenttigine silteme jasap.
Dunyo basylymnyń málimetinshe, Ózbekstannyń bas konsýldyǵyna 2000 jylǵy jáne 1997 jylǵy eki azamat habarlasyp, ózderiniń Mánmada adam saýdasynyń qurbany bolǵanyn aıtyp kómek suraǵan.
Ózbekstandyq azamattarǵa Taılandta joǵary jalaqysy bar jumys usynylǵan. Azamttar kelisken soń, olarǵa Ózbekstannan-Taılandqa ushaqqa tegin bılet berilgen. Biraq bul elge kelgen soń, olar zańsyz Mánma eline jetkizilip, adam saýdasymen aınalysatyn qylmystyq toptyń qolyn túsken. Ol jerde quldyqtaǵy azamattardy alaıaqtyqpen aınalysatyn koll-ortalyqtarda jumys isteýge májbúrlegen. Bul jumysty atqarýdan bas tartqandar soqqyǵa ushyrap otyrǵan. Al olardyń quldyqtan bosap, úılerine oralýy úshin qylmystyq top qomaqty qarajat talap etken.
Qylmystyq top Qazaqstannyń 4 azamatyn, Qyrǵyzstannyń 8 azamatyn, Ózbekstannyń 2 azamatyn quldyqta ustap kelgeni anyqtalǵan. Taılandta Qyrǵyzstannyń elshiligi bolmaýy sebepti bul eldiń azamattarynyń qaıtarylýyna Qazaqstan men Ózbekstannyń konsýldyqtary kómektesken.
Mánma men Taılandtyń quzyrly organdarymen kelisilgen is-qımyldar men kelissózder nátıjesinde Ózbekstan, Qazaqstan jáne Qyrǵyzstan azamattary bosatylyp, Maesot (Taıland) shekaralyq ótkizý pýnktinde Ózbekstan men Qazaqstan dıplomattaryna tapsyryldy, olar ýaqytsha baspanamen jáne azyq-túlikpen qamtamasyz etildi, – dep habarlaǵan Ózbekstannyń Syrtqy ister mınıstrligi.
Al 11 sáýirde Ózbekstan men Qazaqstannyń Taılandtaǵy dıplomatıalyq ókildikteriniń kómegimen Ózbekstannyń 2 azamaty, Qazaqstannyń 4 azamaty jáne Qyrǵyzstannyń 7 azamaty otanyna oralǵan.