İshki naryqta otyn balansyn saqtaý, sondaı-aq munaı ónimderiniń aǵyndary men "sur" eksportynyń táýekelderin azaıtý maqsatynda QR Energetıka mınıstrligi avtokóliktiń tutyný kólemi men shyǵý tegine baılanysty Aı-92, Aı-93 benzıni men dızel otynyna naqtylanǵan baǵalary bar buıryq jobasyn daıyndady.
Qazirgi ýaqytta baǵany memlekettik retteýge baılanysty Qazaqstan Eýrazıalyq ekonomıkalyq odaq elderi arasynda janar-jaǵarmaı quny eń tómen el bolyp tabylady, bul munaı ónimderiniń basqa elderge aǵyndary men "sur" eksportynyń joǵary táýekelderine ákeledi, dep habarlaıdy Almaty-akshamy.kz.
Buıryq jobasymen AI-92 jáne Aı-93 markaly benzınniń baǵasy lıtrine 245 teńge deńgeıinde belgilenedi dep boljanady. Qazaqstan Respýblıkasynda berilgen júrgizýshi kýáligin kórsetken kezde táýligine 100 lıtrge deıingi kólemde baǵa lıtrine 205 teńge qalpynda ózgerissiz qalady. Qazaqstan Respýblıkasynda berilgen motosıklderge, jeńil, júk, arnaıy, mamandandyrylǵan avtomobılder men avtobýstarǵa júrgizýshi kýáligi men kólik quralyn tirkeý týraly kýálik usynylǵan kezde táýligine 300 lıtrge deıin – lıtrine 205 teńge kóleminde.
Qujatta dızel otynynyń baǵasy (jazǵy, maýsymaralyq) lıtrine 315 teńgeni quraıdy dep boljanady. Qazaqstan Respýblıkasynda berilgen júrgizýshi kýáligin kórsetken kezde táýligine 100 lıtrge deıin lıtrine 295 teńge; Qazaqstan Respýblıkasynda berilgen júk, arnaıy, mamandandyrylǵan avtomobılder men avtobýstarǵa júrgizýshi kýáligin jáne kólik quralyn tirkeý týraly kýálikti kórsetken kezde táýligine 300 lıtrge deıin– lıtrine 295 teńge.
Osylaısha, júrgizýshi kýáligi men kólik quralyn Qazaqstan Respýblıkasynda tirkeý týraly kýáligi bar azamattar úshin JJM baǵasy ózgerissiz qalady.
Buıryqtyń jobasy barlyq múddeli taraptardyń talqylaýy men usynystary úshin "Ashyq NQA" saıtynda jarıalandy. Qorytyndy sheshim múddeli taraptardyń usynystaryn eskere otyryp, barlyq rásimder aıaqtalǵannan keıin qabyldanady.
QR Energetıka mınıstrligi qazirgi ýaqytta JJM qorlaryn óndirý, tıeý jáne tolyqtyrý úzdiksiz júrgizilip jatqanyn, ishki naryqta munaı ónimderiniń edáýir qory bar ekenin, JJM-men qamtamasyz etý jaǵdaıy turaqty ekenin habarlaıdy.