Ultty statısıka búrosynyń málimetinshe, óńirlerde mal baǵasy ártúrli
Sý tasqynynan zardap shekken óńirlerde mal shyǵyny úshin ótemaqy naryqtaǵy baǵa boıynsha beriletini aıtyldy. Naryqta mal baǵasy ár óńirde ártúrli, dep habarlaıdy almaty-akshamy.kz.
Aýyl sharýashylyǵy mınıstrliginiń málimetinshe, sý tasqyny bolǵan aımaqtarda 88 myńnan astam mal qaýipsiz jerge shyǵarylǵan. Sondaı-aq sońǵy derekke súıensek, 8,1 myń bas mal sýǵa ketken. Onyń ishinde usaq mal – 6 myń, iri qara – 1,5 myń, jylqy basy – 514. Qazir respýblıkalyq epızootıaǵa qarsy otrád maldyń óleksesin joıýmen aınalysyp jatyr. Búginde 4,1 myń bas maldyń óleksesi joıylǵan. Buǵan qosa, mınıstrlik ólgen maldyń ıelerine ótemaqy tóleý algorıtmi ázirlengenin habarlady.
«Menshik ıeleri men zalaldy anyqtaý jáne basqa da máselelerdi sheshý úshin óńirlerde jergilikti atqarýshy organdarmen shyǵyndy anyqtaý jónindegi komısıalar quryldy. Sý tasqyny saldarynan qyrylǵan maldardyń ıeleri maldary týraly málimetterdi kórsete otyryp, jergilikti komısıaǵa ótinish berýi kerek. Menshik quqyǵy komısıalardyń aktilerimen rastalady. Al menshik ıelerine ótemaqy Ulttyq statısıka búrosy jarıalaǵan talapqa saı beriledi», - dedi mınıstrlikte.
Osyǵan oraı, «Qazaqstanda maldyń naryqtaǵy baǵasy qandaı?» degen suraq týyndaıdy. Ulttyq statısıka búrosynyń 2024 jyldyń naýryzdaǵy málimetinshe, elimizdegi aýyl sharýashylyǵy ónimin óndirýshilerdiń ortasha baǵasy tonnasyna iri qara mal úshin 962 753 teńge, jylqy – 1 092 296 teńge, túıe – 1 061 900 teńge, qoı-eshki – 947 454 teńge, úı qustary – 869 016 teńge.
Sondaı-aq Ulttyq statısıka búrosy tórt túliktiń jasyna qaraı naryqtaǵy baǵasyn da kórsetken.
Máselen, saýyn sıyrdyń baǵasy 369 656 teńge, soıylatyn sıyr quny 374 271 teńgeni quraǵan. Buqa basy 409 972 teńge bolsa, ógiz basy – 426 767 teńge. Al buzaýdyń quny 161 467 teńgeni quraıdy.
Sondaı-aq dónen jáne 3 jastan asqan jylqy basy 531 275 teńge, qunan – 388 984 teńge, jabaǵy men taı basy – 267 913 teńge bolyp bekitilgen.
Túıeniń baǵasy kórsetilgen: ingen – 708 442 teńge, býra – 728 639 teńge, bota-taılaq – 422 995 teńge. Sonymen qatar USB qoı men eshkiniń naryqtaǵy ortasha baǵasyn atady. Atap aıtqanda, qoı – 63 001 teńge, qoshqar – 69 312 teńge, toqty – 46 304 teńge, marqa – 440 820 teńge, qozy – 29 581 teńge bolsa, eshki – 38 517 teńge, laq basy 21 898 teńgeni quraıdy.
Aıta keteıik, bul respýblıka boıynsha ortasha baǵa. Óńirlerde mal baǵasy ártúrli. Mysaly, sý tasqynynan zardap shekken Aqtóbe oblysynda saýyn sıyrdyń quny 409 354 teńge bolsa, Atyraý oblysynda 458 258 teńge, al Batys Qazaqstan oblysynda 429 607 teńgeni quraıdy.