Atom elektr stansıasyn salý máselesine qatysty talqylaýlardyń mańyzy óte joǵary.
Bul talqylaýlar «AES ne úshin salynyp jatyr, ol kimge kerek, memleketimiz ben qoǵamǵa qandaı paıda ákeledi?» degen mańyzdy suraqtarǵa jaýap beredi. Halyqty tolǵandyrǵan saýaldarǵa mamandar naqty jáne tıanaqty jaýap berip otyr. Eń bastysy, barlyǵy referendýmnyń nátıjesine baılanysty. Halyqtyń sheshimi – birinshi orynda.
Bizdiń ýnıversıtetimiz, Ál-Farabı atyndaǵy QazUÝ, AES boıynsha bilikti mamandar daıyndaýǵa qabiletti. Jaqynda biz «Iadrolyq ınjenerıa» mamandyǵyn ashtyq. Oǵan stýdentter qabyldandy jáne olar tórt jyl boıy bilim alady. Alǵashqy eki jylda stýdentter ýnıversıtette teorıalyq bilim alsa, qalǵan eki jylda Iadrolyq fızıka ınstıtýtynda tájirıbeden ótedi. Bul ınstıtýtta zertteý reaktory bar, sondyqtan stýdentter sol jerde praktıkalyq bilimderin jetildirip, naqty tájirıbe jınaqtaıdy.
Qazaqstanda Keńes odaǵy kezinen beri birneshe reaktor bar jáne olardy modernızasıalaý jumystary júrgizilýde. Osy reaktorlarda jumys istegen mamandardyń barlyǵy AES salý jaǵdaıynda da daıyn bolady. Eger AES salý týraly sheshim qabyldansa, qurylys jumystarynyń ózi 8–10 jyl ýaqytty talap etedi. Osy ýaqyt aralyǵynda qosymsha AES mamandaryn daıyndaý qajettigi týyndaıdy. Biz olardy naqty baǵyttar boıynsha daıarlaımyz.
8 jyl – bilikti mamandardy daıyndaýǵa jetkilikti ýaqyt dep esepteımin. Qazirgi tańda AES salý máselesi tek energetıkalyq qaýipsizdikke qatysty emes, sonymen qatar elimizdiń ǵylymı-tehnıkalyq áleýetin damytý úshin de mańyzdy. Osy oraıda, bizge bilikti kadrlar qajet, al olardy daıyndaý bizdiń qolymyzda.
Sondyqtan sheshim qabyldanǵannan keıin, eldiń bolashaǵy úshin jańa energetıkalyq kezeńge daıyn bolýymyz kerek. Halyqtyń pikiri men qoldaýy bul máselede basty ról atqarady, óıtkeni AES – tek energetıkalyq qadam emes, ulttyń uzaq merzimdi damý strategıasynyń bir bóligi.