Men 2007-2008 jyldary Aqtaýda WB300 reaktorlarymen Mańǵystaý oblysynda AES jobasyn alǵashqylardyń biri bolyp usynǵan edim. Sondyqtan bul taqyryp maǵan jat emes. Sol kezden beri kóptegen sheshimder qabyldandy, biraq olardyń barlyǵy birdeı durys baǵytta júzege asyrylǵan joq. Áleýmettik qysymnyń saldarynan túrli popýlısik sheshimderge jol berildi, biraq bul sheshimderden góri, olardyń saldary bizdi jańa daǵdarystarǵa uryndyrdy.
Mysaly, 2018 jyly sol kezdegi Bas prokýrordyń bastamasymen energetıka salasyna aýqymdy tekserý júrgizildi. Sol tekserýlerdiń nátıjesinde "Tarıf ornyna ınvestısıa" baǵdarlamasy buzyldy. Bul sheshimder birden sezilmese de, 2022 jáne 2023 jyldary Qazaqstan energetıkalyq daǵdarysqa tap boldy. Sol kezdegi atom elektr stansıasyn salýǵa qarsy shyqqandar tarıfterdi tómendetý arqyly halyqqa jaqsylyq jasamaq boldy, biraq shyn máninde bul sheshim Rıdder men Ekibastuz sıaqty iri ónerkásiptik qalalardyń energetıkalyq júıesiniń jabylýyna ákeldi.
Osyndaı popýlısik qadamdar bolashaqtaǵy úlken máselelerdiń bastaýy boldy. Energetıka sıaqty kúrdeli jáne strategıalyq mańyzy bar salada qysqa merzimdi sheshimder qabyldaý qaýipti. Atom elektr stansıasyn salý týraly sheshimdi neǵurlym uzaq keshiktirsek, soǵurlym bul bizdiń energetıkalyq qaýipsizdigimizge jáne bolashaǵymyzǵa áser etedi.
Qazaqstannyń energetıkalyq qajettilikteri jyl sanap artyp keledi. Ónerkásiptiń damýy, qalalardyń ósýi jáne kúndelikti turmysta elektr energıasyna degen suranys ósken saıyn, onyń tapshylyǵy aıqyndala túsýde. Biz dál qazir bul máselelerdi sheshýge naqty qadamdar jasamasaq, aldaǵy jyldary energetıkalyq daǵdarys tereńdeı túsýi múmkin. Atom energetıkasy – Qazaqstan úshin strategıalyq mańyzdy joba. Bul salada alǵa jyljyp, energıa kózderin ártaraptandyrýymyz qajet.
Árıne, energetıkalyq jobalardy júzege asyrý uzaq ýaqyt pen úlken ınvestısıalardy talap etedi. Degenmen, bolashaq urpaq úshin senimdi energetıkalyq ınfraqurylym qaldyrý bizdiń búgingi mindetimiz. Atom elektr stansıasy – bul bolashaqqa jasalatyn ınvestısıa, jáne biz ony keıinge qaldyrmaı, qazirden bastap áreket etýimiz kerek.