Qytaıdyń iri ekonomıkalyq jáne ónerkásip ortalyǵy sanalatyn Shenchjen qalasynyń 200-den astam kásipkeri bıylǵy 14 tamyzda ótken qazaq-qytaı birinshi bıznes-forýmyna qatysty, dep habarlaıdy Almaty-akshamy.kz.
Qazaqstan-Qytaı saýdasyna járdemdesý qaýymdastyǵy men Shenzhen Cross Supply Service Association birlesip uıymdastyrǵan is-sharada Qytaıdyń yqtımal ınvestorlaryna Qazaqstannyń ınvestısıalyq múmkindikteri tanystyryldy.
Forýmnyń ashylýynda QR Premer-Mınıstrdiń orynbasary – Saýda jáne ıntegrasıa mınıstri Serik Jumanǵarın eki el halyqtary arasynda qalyptasqan tyǵys baılanysty atap ótti.
Vıse-premer Qazaqstanǵa tartylatyn ınvestısıalardyń negizgi úsh baǵytyn aıqyndady.
Birinshisi – logıstıka, ol qoldanystaǵy baǵyttardy damytyp, jańa baǵyttardy ashýdy, ınfraqurylym júrgizip, júkteý-túsirý ortalyqtaryn ashýdy kózdeıdi. Osy baǵyt iri kólik operatorlary úshin erekshe qyzyǵýshylyq týdyrady.
Búginde shekara mańynda saýda-ekonomıkalyq habtar, logıstıkalyq ortalyqtar jelisi qurylýda, olar ári qaraı keńeıtý áleýeti bar EAEO jáne Ortalyq Azıa elderiniń negizi bolmaq. Qazaqstannyń ár oblysyndaǵy erekshelikterdi eskere otyryp qurylǵan arnaıy ekonomıkalyq jáne ındýstrıalyq aımaqtar bar. Olarǵa salyqtyq preferensıalar pýly usynylyp, arnaıy quqyqtyq rejım qoldanylady. Salyqtar men bajdardy tóleýden bosatý túrindegi ınvestısıalyq preferensıalarmen qosa, jaqynda ınvestorlarǵa bastapqy kezeńde júktemeni azaıtýǵa baǵyttalǵan ınvestısıalyq salyq nesıesi engizildi. Iaǵnı ınvestorlarǵa korporatıvtik tabys salyǵy jáne (nemese) múlik salyǵy aıasynda tólemderdi úsh jylǵa deıingi merzimge 100%-ǵa tómendetý múmkindigi beriledi, - dedi S. Jumanǵarın.
Búgingi tańda Qytaı shekarasynda kedergisiz saýdany damytý úshin «Qorǵas – Shyǵys qaqpasy» arnaıy ekonomıkalyq aımaǵyn (AEA) qalyptastyrý tolyǵymen aıaqtaldy. AEA ınfraqurylymyna ındýstrıalyq jáne logıstıkalyq aımaqtarmen qatar, 2015 jyly eldiń shyǵysynda júkterdi jınaý men taratý úshin iske qosylǵan qurǵaq port kiredi. 2014 jyly Lánúngan portynda qytaılyq seriktestermen birlestikte logıstıkalyq termınal quryldy, ol búginde Qazaqstanǵa/Qazaqstannan júkterdi jınaıtyn negizgi beket bolyp otyr. )9r5a0 port Qytaımen shekaradaǵy «Jetigen – Qorǵas» temirjoly jáne «Batys Eýropa – Batys Qytaı» avtomagıstralimen tehnologıalyq baılanys negizinde jáne iri kólik-logıstıkalyq operatorlardy tartý arqyly Eýrazıalyq transkontınentaldyq tasymaldardy damytýdyń jańa kezeńin ashty.
Vıse-premer ınvestısıalar úshin ekinshi baǵyt retinde ónimdi tereń óńdeýdi, al úshinshi baǵyt retinde aýyl sharýashylyǵyn atap ótti.
Qazaqstan men QHR arasyndaǵy ózara saýda 2022 jyly rekordty kórsetkishterge jetip, 24,1 mlrd dollardy qurady. Atap aıtqanda, qazaqstandyq ónimniń Qytaıǵa eksporty úshten birden astamǵa artyp, 13,2 mlrd dollar boldy. Import 33,5% artyp, 11 mlrd dollardy qurady. Elder arasyndaǵy saýda-sattyq 2023 jylǵy birinshi jartyjyldyqta 20,5% kóbeıip, 13,6 mlrd dollardy qurady, onyń ishinde 6,3 mlrd dollar qazaqstandyq eksportqa tıesili.