El Prezıdenti Qasym-Jomart Kemeluly Toqaevtyń 2022 jyly 1 qyrkúıektegi: «Ádiletti memleket. Birtutas ult. Berekeli qoǵam.» atty Joldaýyn jastardyń arasynda keńinen nasıhattaý maqsatynda Joǵarǵy bilim jáne ǵylym mınıstrliginiń aqparattyq qoldaýymen «BILIM-ORKENIETI» ulttyq ınovasıalyq ǵylymı-zertteý ortalyǵy Respýblıkalyq «Jańa Qazaqstandaǵy – Úzdik stýdent» forýmyn uıymdastyrǵan eken.
İs-sharanyń negizgi maqsaty – Respýblıkadaǵy daryndy jastar arasynda baılanys ornatý. Patrıottyq sezimderin, shyǵarmashylyǵyn shyńdaý, ınovasıalyq oılaý qabiletterin damytý.
Konferensıaǵa ǵalymdar, qoǵam qaıratkerleri jáne BAQ ókilderi men birge QR UQK Shekara akademıasy 3-oqý dıvızıonynyń kýrsanty Qobylandy Aıdos Daýrenuly da qatysqan bolatyn. Atalmysh konferensıanyń nátıjesinde, Qazaqstannyń joǵary oqý oryndary arasynda kýrsant Qobylandy Aıdos Dáýrenuly 2022/2023 oqý jylynda «Úzdik stýdent» atanyp, Qazaqstannyń úzdik stýdenti dıplomymen jáne medalimen marapattalǵan.
Jaqsynyń jaqsylyǵyn aıt nury tasysyn demekshi, búginde Shekara akademıasynyń maqtanyshyna aınalǵan A.Qobylandy Soltústik Qazaqstan oblysynyń Pavlodar qalasynyń týmasy. 2020 jyly osyndaǵy №35 jalpy orta mektepti úzdik atestatqa bitirgen.
Ol mektep qabyrǵasynda júrip-aq ár pán boıynsha aýdandyq, oblystyq, Respýblıkalyq olımpıadalardyń jeńimpazy atanǵan eken. Bilim-ǵylymǵa jany qumar shekarashy kýrsanttyń aıtýynsha, ol kishkentaıynan áskerı qyzmetshi bolýdy armandaǵan. Shekara akademıasynda oqyp júrgenin maqtan tutady eken.
«Shekara akademıasy túsine bilgen adamǵa bir úlken áskerı ujym. Munda barlyǵy bir-birine oqýda, sportta jáne basqa da is-sharalarda kómektesedi. Bizdiń uranymyz: «Birimiz bárimiz úshin, bárimiz birimiz úshin». Kýrsanttyń ómiri óte alýan túrli jáne kúndelikti stýdenttik ómirden erekshelenetin jarqyn oqıǵalarǵa toly. Akademıada oqyp júrgen jyldardy jáı ǵana qaǵazǵa jazyp jetkizý múmkin emes, tipti aýyz eki tilde aıtyp jetkize almaısyń. Ony tek jan dúnıeńmen sezinýiń kerek. Ol úshin óziń osy ortada ómir súrýiń kerek.
Men oqý-bilimge qumar izdenimpaz kýrsanttardyń barlyq saýaldaryna jaýap bere alatyn, jaýngerlik daıarlyqtaǵy jetistikterimiz úshin, sondaı-aq jas urpaqty áskerı-patrıottyq tárbıeleýge qosqan úlesi úshin akademıanyń profesorlyq-oqtyýshylar quramyna rızamyn.
Meniń oıymsha, áskerı oqý ornynda oqýǵa ekiniń biriniń júregi daýalaı bermeıdi. Óıtkeni, olar temirdeı tártipti talap etetin áskerı ómirdiń qıynshylyqtaryna shydaı bermeıdi. Munda tek naǵyz óz eliniń patrıottary ǵana oqıdy. Olar Otanǵa qyzmetti –abroıly mindet dep qana túsinedi», - deıdi polkovnık Qaırat Muhametjanov jetekshilik etetin 3-oqý dıvızıonnyń kýrsanty Aıdos Dáýrenuly bizge bergen suhbatynda.