Bıylsha Blınkendi Qytaıdyń dámi tartpaı turǵandaı. AQSH memlekettik hatshysynyń Beıjiń saparynan taǵy da bas tartýy múmkin. Ol kópten kútken dıplomatıalyq saparǵa daıyndalyp jatqanda, AQSH-Qytaı arasynda qaýipsizdikke qatysty taǵy bir shý shyqty.
Baıdenniń bas dıplomaty Entonı Blınken osy demalys kúnderi Qytaıǵa resmı saparmen barmaq edi. Saparynyń maqsaty eki el arasyndaǵy tereńdeı túsken qaıshylyqty jeńildetý bolatyn. Dál osy kezde Qytaıdyń Qurama Shtattarda tyńshylyq jáne barlaý jumysyn júrgizýge tyrysatyny jaıynda aqparat tarady. Bul sapar qarsańynda Blınkendi taǵy bir ret aýyr saıası qysymǵa qaldyrdy.
Wall Street Journal, Washington Post sekildi amerıkalyq asa yqpaldy basylymdar taratqan habar Aq úıdi aqparattyq tasqynmen soǵyp ótti. Onda Qytaı Kýba jerinde arnaıy stansıa quryp, Amerıka Qurama Shtattaryna qarsy barlaý júrgizýge kúsh salyp jatqany aıtylǵan.
Ýoll-strıttiń áıgili basylymy aty-jóni jasyrylǵan joǵary laýazymdy tulǵaǵa silteme jasap, Qytaı men Kýba arasynda kelisim jasalyp jatqanyn habarlady. Habarǵa qaraǵanda, Qytaı AQSH-tan nebary 145 shaqyrym qashyqtyqtaǵy Kýba jerinde barlaý stansıasynyń qurlysyn salmaq. Ol AQSH terıtorıasyn jiti baqylaý múmkindigine ıe bolady delingen.
Esterińizde bolaar, aqpan aıynda Blınken Qytaı saparyna daıyndalyp jatqanda «Shar oqıǵasy» bolyp, sapar keıinge qaldyrylǵan. Qytaıdyń bıik ushatyn baqylaýshy áýe shary AQSH keńistiginde paıda bolǵan. Ony amerıkalyq joıǵysh ushaq atyp túsirgen. Oqıǵa Vashıngton men Beıjińniń mámilesin sýytyp, arasyn alystatqan. Titpi, eki el arasynda dıplomatıalyq is-qımyldar da salqyndap qalǵan edi.
Blınken sapardan bas tartatyny týraly málimdeme jasamady. Bul dıplomatıalyq sapar bolatyn, ıa bolmaıtynyn boljaý da qıyn. Qalaı degenmen eki el arasy barǵan saıyn sýyp bara jaqanyn kórýge bolady.