Túrkistan oblysynyń Ózbekstanmen shekarasynda myńdaǵan tonna kartop shirip jatyr, dep habarlaıdy aqshamnews.kz KTK-ǵa silteme jasap.
Sebebi, Pavlodardan Tashkentke jetkizilýge tıis kartopty aýyl sharýashylyǵy bóliminiń ókilderi tekseremiz dep, Saryaǵash shekarasynda toqtatqan. Sóıtip on kún boıy sheneýnikter qujat tekserip júrgende, 43 vagonǵa artylǵan kartop buzyla bastapty.
Kartop tıegen vagondar Saryǵashtyń temir jolynda tapjylmaı on kún tur. Pavlodardan shyqqan júk poıyzyn fıto-sanıtarlar 19 qańtar kúni toqtatyp, júktiń qujaty men ónimdi tekseremiz degen. Biraq sol kúıi eshqaısysy tóbe kórsetpedi degen kásipkerler artylǵan kartoptyń kúıin kórý úshin vagondy ashyp kórdi.
Azamat Serikbaev, kásipker: — Kartoptyń sýy shyǵyp, irip-shirip jatyr. Bul qaıta sýy qatyp tur, jylyǵa shyqsa birden shirıdi. Bul endi jaramsyz kartop. Bir vagonnyń ózinde 68 tonna bar, sol 68 tonna vartop endi jaramsyz. On kúnnen beri jaýaptylardan habar kútip júrgender endi bul shirigen taýardy tapsyrys berýshilerge «ne betimizben aparamyz» dep kúıinedi.
Úsip, byljyrap ketken kartopty keıbiri laqtyryp ta jatyr. Jalpy 43 vagon kartopqa kásipkerler qujatty 15 qańtarǵa deıin jasatqan. Al bul ónimdi elden tys shyǵarýǵa bolmaıdy degen qaýlyny aýyl sharýashylyǵy mınıstrligi 18 qańtardan bastap shyǵarǵan. Sondyqtan tez buzylatyn ónimdi shekarada negizsiz ustap turǵandar kartobymyzdy jarty baǵasyna satýdy talap etti deıdi.
Nursultan Ormanov, kásipker: — Ákimdik bizge jarty baǵasyna surap tur. 100-150 teńgeden suraıdy. Kelisin 300-den alǵanbyz. Kelem degenshe, iri kartop 370 teńgeden kelgen, osy jerge deıingi shyǵyny. Olar 150 teńgeden suraıdy. Bilmeımiz, endi ne isteıtinimizdi. Shyǵynnyń bári moınymyzda. Qazir úsh vagonnan 60 mıllıon shyǵyn shyǵyp tur. Ol ońaı aqsha emes qoı.
Al vagondardy turalatyp qoıǵan quzyrly mınıstrlik osy ýaqytqa deıin «qujattardy tekserdik» deıdi. Biraq túıtkil bolmaǵan soń, endi 43 vagon dittegen jerine júre berse bolady dep otyr.
Erbol Tasjúrekov, QR Aýyl sharýashylyǵy vıse-mınıstri: — Búgingi kúni meniń aqparatym boıynsha tekserý jumystary bitti. Qajetti aqparattar anyqtaldy. Sondyqtan búgingi kúnge vagondardyń syrtqa ketýine eshqandaı tosqaýyl joq. Sondyqtan eksportqa baǵyttalǵan 43 vagon kartop artylǵan shekaradan shyǵyp kete beredi.
On kún boıy turalap turǵan vagondardyń jyljýyna ruqsat berildi. Alaıda kartoptyń «jaramdysynan jaramsyzy kóp» degen kásipkerler endi shyǵynyn eseptep, tez buzylatyn ónimdi tym kóp ustaǵan sheneýnikterdi sotqa beremiz dep bekinip otyr.