Almaty ákimdigi N.Sas atyndaǵy teatr ǵımaratynyń qaıta jóndeý jumystary týraly málimet berdi
Almatyda N.Sas atyndaǵy orys memlekettik akademıalyq balalar men jasóspirimder teatrynyń ǵımaratyn jóndeý jumystary jaqynda bastalady. Jóndeý jobasy memlekettik saraptamadan ótti, qala ákimdigi qurylys jumystaryn júrgizetin merdiger uıymdy anyqtaý úshin baıqaý jarıalady.
Almatynyń Qurylys basqarmasy jobada qandaı sheshimder qarastyrylǵanyn jáne ony júzege asyrýǵa ne úshin 21,7 mlrd teńge bólingenin túsindirdi.
«Ǵımarat 1980-jyldary salynǵan jáne sodan beri oǵan eshqashan kúrdeli jóndeý júrgizilmegen. Teatr ujymy ǵımarattyń múshkil jaǵdaıyna qoǵamnyń nazaryn birneshe ret aýdarǵan. Qala ákimine júgingennen keıin ol megapolıs úshin mańyzy zor nysandy rekonstrýksıalaýǵa tapsyrma berdi. Tehnıkalyq zertteý barysynda jabdyqtardyń, ınjenerlik jelilerdiń, shatyrdyń, qasbet taqtalarynyń jáne ishki árleý jumystarynyń edáýir tozǵany anyqtaldy. Shatyrdan aqqan sý sahna men kórermen zalyna deıin jetedi, qasbettiń taqtalary qulap, júrginshilerge qaýip tóndirip otyr, al eski elektr symdary órt qaýpin týdyrady. Qazirgi tańda ǵımarat qaýipsizdik talaptaryna sáıkes kelmeıdi jáne estetıkalyq kórinisin joǵaltqan», – dedi basqarma basshysy Almas Shabdarbaev.
Rekonstrýksıalaý jobasy qoǵam ókilderi men sarapshylar arasynda keńinen talqylandy. Jobaǵa sáıkes, tirek qurylymdary nyǵaıtylady, shatyr men qasbet taqtalary aýystyrylady, barlyq ınjenerlik komýnıkasıa jańartylady. Ǵımarat tolyq avtomatty órt sóndirý júıesimen jabdyqtalady. Sondaı-aq, teatr jabdyqtary, sahna, jaryqtandyrý tolyqtaı jańartylyp, oryndyqtar arasyndaǵy ótpeler keńeıtilip, múmkindigi shekteýli jandar úshin qolaıly jaǵdaı jasalady.
«Ǵımarat jergilikti mańyzǵa ıe tarıhı jáne mádenı eskertkish bolǵandyqtan, onyń sáýlet elementterin qalpyna keltirý men saqtaýǵa erekshe nazar aýdaryldy. Mysaly, bastapqy jobaǵa sáıkes, holdyń eden jabynynyń tarıhı kelbeti men ǵımarattyń foıesindegi mozaıka da qalpyna keltiriledi», – dedi basqarma basshysy.
Bul jumystardyń barlyǵy 14,6 myń sharshy metr bolatyn qoldanystaǵy ǵımaratty rekonstrýksıalaý jumystary aıasynda júrgiziledi.
Sonymen qatar, janynda 10 myń sharshy metrlik úsh qabatty jańa ǵımarat salynady. Jańa ǵımaratta 200 oryndyq sahnasy bar zal, grım bólmeleri, sheberhanalar men sehtarǵa arnalǵan bólmeler, dekorasıalardy saqtaýǵa arnalǵan qoımalar, kórkemdik jetekshi qyzmetkerlerge arnalǵan kabınetter, balalar teatr stýdıasyna arnalǵan oqý sahnasy men synyptar ornalasady. Eki ǵımaratty galereıalyq ótkel baılanystyrady.
Teatr – keńse ǵımaraty emes, sondyqtan onyń jaryqtandyrý jabdyqtary, dybys aparatýrasy, jeldetý jáne kondısıonerleý júıeleri, dekorasıa mehanızmderi bar sahnalar sıaqty arnaıy tehnıkalyq júıelerdi ornatýdy qajet etedi. Akýstıka men jaryqtandyrýdy montajdaý erekshe kúrdeli jumystyń biri. Teatr – bul qurylym men tehnıkaǵa úlken júkteme túsetin oryn, sondyqtan jabdyqtaý qatań standartqa saı bolýy tıis, bul akterlerdiń, tehnıkalyq qyzmetkerdiń jáne kórermenderdiń qaýipsizdigin qamtamasyz etedi.
«Bólingen qarajattyń qurylymyn qarasaq, eki ǵımaratty zamanaýı jabdyqpen tolyq qamtamasyz etýge shamamen 6 mlrd teńge qajet. Qoldanystaǵy ǵımaratty rekonstrýksıalaýǵa 6 mlrd teńge jáne jańa ǵımarat salýǵa shamamen 9 mlrd teńge qarastyrylǵan. Sonymen qatar, eki ǵımaratty baılanystyratyn galereıa salynady, syrtqy jeliler aýystyrylady jáne irgeles aýmaqty kógaldandyrý men kórkeıtý jumystary júrgiziledi. Bul aýqymdy joba, jumys aıaqtalǵannan keıin teatr qalanyń shyǵys bóliginde turǵyndar jıi keletin orynǵa aınalady dep senimmen aıtýǵa bolady», – dedi Almas Shabdarbaev.
Aıta keteıik, negizgi ǵımarattyń rekonstrýksıalaý jumystaryn osy jyldyń sońyna deıin aıaqtaý josparlanǵan, al jobanyń tolyq aıaqtalýy 2026 jyldyń birinshi toqsanyna belgilengen.
