Almatydaǵy N. Sas atyndaǵy balalar men jasóspirimderge arnalǵan memlekettik akademıalyq orys teatry jaqyn arada tolyq rekonstrýksıadan ótpek. Bul ózgeristi teatr ujymy asyǵa kútip otyr. Teatrdyń bas rejıseri Irına Sımonovanyń aıtýynsha, ǵımarattyń qazirgi jaǵdaıy tek jumys isteýge ǵana emes, kelýshiler men qyzmetkerlerdiń qaýipsizdigine de qater tóndirýde, dep habarlaıdy Aqshamnews.kz
N. Sas atyndaǵy teatrdyń ǵımaraty 1980-jyldary salynǵanymen, sodan beri eshqashan kúrdeli jóndeýden ótpegen. Búginde onyń tozyǵy jetip, tek mádenıet ortalyǵy ǵana emes, qala turǵyndary úshin de qaýipti aımaqqa aınalǵan. Teatr qyzmetkerleri tóbeden plıtalar qulap ketýi múmkin ekenin, al jańbyrly kúnderi ǵımarattyń ishin sý basatynyn aıtyp, dabyl qaqty.
«Qaptalǵan plıtalardyń qulaýy – tek ýaqyt máselesi. Bul tek teatr qyzmetkerlerine ǵana emes, ótip bara jatqan jaıaý júrginshiler úshin de qaýipti. Sonymen qatar, kórermender zalynyń edeni ábden tozǵan, al aǵash palýba aýyr júktemege shydas bermeıdi», – dep atap ótti teatr ókili.
Bas rejıser Irına Sımonova ǵımarattyń kúrdeli jóndeý qajettiligi týraly máseleniń birneshe jyl boıy kóterilip kele jatqanyn aıtady. Almaty ákimdigi bul máselege beı-jaı qaramaı, teatrdyń tolyq jańarýyn qoldaǵan.
«Biz qala ákimdigi men Almaty ákimi Erbolat Dosaevtyń qoldaýyna rızamyz. Tek jóndeý jumystarymen shektelmeı, teatr ǵımaratyna qosymsha jańa nysan salynatyny biz úshin kútpegen jaǵymdy jańalyq boldy», – dedi bas rejıser.
Jańa ǵımaratta 200 oryndyq kameralyq sahna ashylady. Bul teatrǵa zamanaýı tehnologıalarmen jabdyqtalǵan jańa keńistik alýǵa múmkindik beredi. Sonymen qatar, kórmeler, dárister, konsertter ótkizýge arnalǵan oryndar qarastyrylǵan. Bul ózgerister N. Sas teatrynyń shyǵarmashylyq áleýetin arttyryp, halyqaralyq deńgeıde gastróldik is-sharalardy uıymdastyrýǵa jol ashady.
Jańartylǵan teatr tek balalar men jasóspirimder úshin emes, barlyq jastaǵy kórermenderge arnalǵan mádenı keńistik bolmaq. Teatr ujymy bul ózgerister Qazaqstannyń jas urpaǵyn tárbıeleýge jáne olardyń rýhanı damýyna oń áser etetinin atap ótti.
«Bizdiń basty mısıamyz – kórermenderdi tek qyzyqty qoıylymdarmen qýantyp qana qoımaı, olardyń oı-órisin keńeıtip, rýhanı baıytý. Biz teatrdy jańa zaman talabyna saı jańǵyrtý arqyly ulttyq mádenıetti damytýǵa úles qosamyz», – dep qorytyndylady Irına Sımonova.
Bul jańartý N. Sas atyndaǵy teatrdyń jańa beleske kóterilýine múmkindik beredi. Almaty qalasynyń turǵyndary men qonaqtary kóp uzamaı teatrdyń jańartylǵan ǵımaratynda ónerdiń jańa tynysyn sezine alady.