«Qazsýshar» fılıaldary sýarý maýsymynda elimizdiń sharýalaryna 6,12 mlrd tekshe metr sý berdi.
Búgingi tańda dıhandarmen sýarmaly sý berý týraly 23 886 kelisimshart jasalǵan, dep habarlaıdy aqshamnews.kz Sý resýrstary jne ırrıgasıa mınıstrligine silteme jasap.
Osyǵan deıin Sý resýrstary jáne ırrıgasıa mınıstri Nurjan Nurjigitov Ózbekstan tarapymen jarty jylda elimizge Syrdarıa ózeni arqyly 3,7 mlrd tekshe metr sý jiberý týraly kelisimge kelgen bolatyn. Sýarý kezeńiniń sońyna deıin ózbek tarapy taǵy 500 mln tekshe metr sý jiberedi.
Al, Shý-Talas sý sharýashylyǵy komısıasynyń 33-shi otyrysynda Qazaqstanǵa Qyrǵyzstannan Shý ózeni arqyly 180 mln tekshe metr jáne Talas ózenimen 380 mln tekshe metr sý berý týraly ýaǵdalastyqqa qol jetkizildi.
«Elimizdiń barlyq aımaǵyndaǵy sharýalarǵa turaqty túrde sý berilip jatyr. Bıyl sýarmaly sýdyń jetispeýshiligi baıqalmaıdy. Aýyl sharýashylyǵyn turaqty sýmen qamtamasyz etý úshin vegetasıa kezeńine deıin de kóp jumys atqaryldy. Sý dıplomatıasy kúsheıtildi, osynyń arqasynda elimizdiń ońtústigindegi sharýalar qajetti sý kólemin aldy. Keıbir sharýa qojalyqtary ekinshi márte ónim jınaýǵa daıyndalyp jatyr»,- dedi Sý resýrstary jáne ırrıgasıa vıse-mınıstri Nurlan Aldamjarov.