Ótken demalys kúnderi Almaty oblysynyń polıseıleri kóshi-qon zańnamasyn buzǵan azamattardy anyqtady.
Polısıa qyzmetkerleri Qarasaı aýdanynyń aýmaǵynda ornalasqan úsh kirpish zaýyty men “Altyn Orda” saýda-logıstıkalyq ortalyǵyn tekserdi, dep habarlaıdy aqshamnews.kz Polisia.kz-ke silteme jasap.
– Nátıjesinde QR kóshi-qon salasyndaǵy zańnamany buzǵany úshin 175 shetel azamaty jaýapkershilikke tartylyp, onyń ishinde jeke basyn kýálandyratyn qujattary joq bolǵandyqtan 95 adam qabyldaý-taratý ornyna jetkizildi, – atap ótti oblystyq kóshi-qon qyzmeti basqarmasynyń bastyǵy Rústem Jaryqbasov.
Statısıka kórsetkendeı, sheteldik azamattardyń kópshiligi QR aýmaǵyna jumys isteý úshin kirgen. Olardy eńbek qyzmetine tartý máseleleri zańnamamen rettelgen, osyǵan baılanysty tártip saqshylary kóshi-qon zańnamasynyń talaptaryn múltiksiz saqtaý qajettigin eske salady.
– Otandastarymyzdyń tarapynan qabyldaýshy tulǵalar kóshi-qon qyzmetine sheteldiktiń kelgeni týraly habarlaýǵa mindetti ekenin eske salamyz. QR Úkimetiniń 2012 jylǵy 21 qańtardaǵy №148 qaýlysymen bekitilgen “Qazaqstan Respýblıkasynda kóship kelýshilerdiń kelýi men bolý qaǵıdalarynyń” 9-tarmaǵyna sáıkes sheteldik azamattardy qabyldaıtyn jeke jáne zańdy tulǵalar ózderinde bolyp júrgen kóship kelýshiler týraly ishki ister organdaryn habardar etýge mindetti. Bul habarlama mindetti túrde shetel azamaty kelgen kúnnen bastap úsh jumys kúni ishinde beriledi. Kórsetilgen merzimdi ótkizip alǵan jáne sheteldikterdiń bolýy týraly ishki ister organdaryna habarlamaǵan jaǵdaıda, Qazaqstanda qabyldaýshy Jeke jáne zańdy tulǵa ÁQBtK boıynsha jaýapqa tartylatynyn eskertemin. Jeke jáne zańdy tulǵalar ımıgranttyń kelgeni týraly tikeleı “e-Qonaq” elektrondyq vızalyq-kóshi-qon portaly arqyly habarlaı alady, – dep tolyqtyrdy R. Jaryqbasov.