Qazaqstan bankterinde berile bastaıdy.
Elimizde Islam qarjylandyrý júıesin damytýǵa baǵyttalǵan jańa zań jobasy daıyndalyp jatyr, dep habarlaıdy aqshamnews.kz
Bankter "Islam terezeleri" atty jańa júıemen jumys isteı bastaýy múmkin. Bul týraly senatta qarjy naryǵyn retteý jáne damytý agenttigi tóraǵasynyń birinshi orynbasary Nurlan Ábdirahmanov málimdedi.
Elimizde Islam bankteriniń qyzmetine quqyqtyq negiz 2009 jyly qalanǵan, al 2015 jyly Islam saqtandyrý júıesi engizildi. Búginde Qazaqstanda eki Islam banki jumys isteıdi. Biraq olardyń jalpy bank júıesindegi úlesi nebári 0,4 paıyzdy quraıdy. Bul salany damytý úshin halyqaralyq tájirıbeni zerttep jatyrmyz. Kóptegen musylman elderinde Islam bankteri dástúrli bank sektorymen qatar qyzmet ete beredi. Osyǵan baılanysty jańa zań jobasy aıasynda bankterge «Islam terezelerin» ashý tetigin engizbekpiz. Bul bastama dástúrli bankterge paıyzdyq júıemen de, Islamdyq paıyzsyz qarjylandyrýmen de qatar jumys isteýge múmkindik beredi, – dedi Ábdirahmanov.
Mınıstrliktiń josparyna sáıkes, zań jobasy osy jyldyń tamyz aıynda engiziledi. Bul ózgeris bankterdiń qarjylyq ınfraqurylymyn keńeıtip, halyqtyń keń aýqymyna qyzmet kórsetýine jol ashady. Sonymen qatar, jańa reforma sheteldik Islam qarjylyq ınstıtýttaryn tartýǵa da yqpal etýi múmkin.
Islam bankteri Qazaqstan ekonomıkasyna 12 mlrd teńge tikeleı ınvestısıa saldy. Aldaǵy ýaqytta bul kórsetkish eselep ósedi dep kútilýde. Sheteldik ınvestorlar kólik, energetıka, densaýlyq saqtaý salalaryna qarjy quıýǵa qyzyǵýshylyq tanytyp otyr, – dep qosty Ábdirahmanov.
Bul bastamany qarjy sarapshylary da qoldap otyr. "Halyq bank" tóraǵasynyń orynbasary, táýelsiz sarapshy Dáýren Sartaevtyń pikirinshe, Islam qarjy júıesiniń damýy úshin birinshi kezekte "Islam terezelerin" ashý mańyzdy.
Resmı statısıkaǵa sáıkes, qazaqstandyqtardyń 60%-dan astamy Islam dinin ustanatynyn aıtqan, al 20%-y ózin din jolyndaǵy musylman sanaıdy. Alaıda Islam qarjysynyń úlesi nebári 0,4% ǵana. Bul kórsetkishti arttyrý úshin bankter ózderiniń ınfraqurylymy arqyly Islam qarjylandyrý tetikterin usynýy kerek. Qazirgi zańnama boıynsha, Sharıǵat talaptaryna saı qarjylandyrýdy júzege asyrý úshin bólek zańdy tulǵa qurý qajet, bul – uzaq ári shyǵyndy proses. Al eger bankter óz ınfraqurylymynyń negizinde Islam qarjysy qyzmetin usynsa, bul úrdis áldeqaıda jyldam ári tıimdi júredi, – dedi Sartaev.
Onyń aıtýynsha, bul baǵytta salyq zańnamasyn jetildirý de mańyzdy ról atqarady.
Islam bankteri bıznes qurylymdarymen seriktestik negizinde jumys isteıdi. Sondyqtan qosymsha qun salyǵy men tabys salyǵy máselesin durys retteý qajet. Eki tarap ta turaqty ári ádil paıda tabý úshin naqty quqyqtyq baza bolýy kerek," – dep atap ótti sarapshy.
Qarjy naryǵyn retteý jáne damytý agenttigi zań jobasyn bıyl tamyzda Parlamentke engizgeli otyr.