Qazaqstanda radıoaktıv qaldyqtardy ıgerý jónindegi jańa zań jobasy ázirlenedi. Onyń aıasynda ıadrolyq qaýipsizdik salasyna qatysty birqatar túzetpe engizý qarastyrylǵan. Osyǵan baılanysty Májilis tóraǵasy Erlan Qoshanov bastaǵan delegasıa Almatydaǵy Iadrolyq fızıka ınstıtýtyna baryp, beıbit atomdy paıdalaný boıynsha otandyq jobalarmen tanysyp, zań jobasyn ázirleý tásilderin ǵalymdarmen birge talqylady, dep habarlaıdy aqshamnews.kz.
Erlan Qoshanovtyń aıtýynsha, jańa zańnamalyq normalar elde AES salý jáne atom salasyn damytý úshin barynsha qolaıly jaǵdaı jasaýdy kózdeıdi. Bul rette MAGATE-niń halyqaralyq talaptary eskeriletin bolady. Májilis spıkeri túzetýler Májiliste ashyq talqylaýdan ótip, qoǵamnyń jáne barlyq múddeli taraptardyń pikirleri eskeriletinin atap ótti.
Instıtýt qyzmetkerlerimen áńgime barysynda AES úshin kadr daıarlaý, ıadrolyq qaldyqtardy qaıta óńdeý, ıadrolyq ındýstrıa ónimderine jańa standarttar engizý jáne atom salasynyń el ekonomıkasyna tolyqqandy jumys isteýi úshin qajetti jaǵdaı jasaý boıynsha birqatar usynys aıtyldy. Bul rette úzdik sheteldik tájirıbeler eskeriledi.
Depýtattar bolashaq AES-tiń shaǵyn kóshirmesi sanalatyn VVR-K zertteý reaktorymen tanysty. Iadrolyq fızıka ınstıtýtynyń bas dırektory, fızıka-matematıka ǵylymynyń doktory, Qazaqstan Ulttyq jaratylystaný ǵylymdary akademıasynyń akademıgi Saıabek Sahıev ınstıtýtta joǵary bilimdi mamandardy tájirıbelik turǵyda daıarlaýǵa arnalǵan baza bar ekenin atap ótti.
Iadrolyq fızıka ınstıtýty qyzmetkerlerimen kezdesýde Erlan Qoshanov bul ǵylymı mekemeniń AES qurylysy jobasyn júzege asyrýdaǵy erekshe rólin atap ótti.
Ol ınstıtýttyń MAGATE-niń úzdik álemdik standarttaryna saı elimizde beıbit atommen jumys isteýge tájirıbesi de, biliktiligi de jetkilikti ekendiginiń aıqyn dáleli ekenin aıtty. Sondaı-aq sapar barysynda depýtattar radıofarmpreparattar óndirisi keshenimen tanysty. Onda Qazaqstandaǵy jalǵyz Cyclone-30 qondyrǵysy jumys isteıdi.