Shardara sý qoımasy mańynan qundy tarıhı jádigerler tabyldy, dep habarlaıdy almaty-akshamy.kz
Qýańshylyqqa baılanysty qoımadaǵy sý deńgeıiniń tómendep ketý saldarynan múıistegi «Aqtóbe-2» dep atalatyn orynda birqatar artefaktiler topyraqtyń betine shyǵyp qalǵan. Aýdandyq tarıhı-ólketaný mýzeıiniń uıymdastyrýymen «Aqtóbe-2» tarıhı turaǵynda ekspedısıalyq qazba jumystary júrgizildi. Nátıjesinde qysh qumyralar, turmystyq zattar, kirpishter men káriz júıeleri, tipti adamnyń súıegi de tabyldy.
Arheologtardyń tujyrymy boıynsha, kóne zattar VI-VIII ǵasyrlarǵa tıesili. Tarıhshylardyń aıtýynsha, Shardara mańynan buǵan deıin de birneshe qalashyqtar men qorymdar, Qarahanıd dáýirine jatatyn qundy jádigerler tabylǵan. Sondyqtan mamandar Shardara aýmaǵy qosymsha zertteýdi qajet etetinin aıtady. Sonda ǵana kóne jádigerlerdiń kómbesine aınalǵan orynǵa qatysty tyń derekter paıda bolýy múmkin.