Qoǵamdyq densaýlyq saqtaý ulttyq ortalyǵynyń «Sanıtarlyq-epıdemıologıalyq saraptama jáne monıtorıń ǵylymı-praktıkalyq ortalyǵy» fılıaly dırektorynyń orynbasary Manar Smaǵul jasóspirimder men júkti áıelderdi COVID-19-ǵa qarsy vaksınalaý týraly pikir bildirdi, dep habarlaıdy almaty-akshamy.kz inform.kz silteme jasap.
«Damyǵan elderdiń bári jasóspirimder men júkti áıelderge osy vaksınany salyp jatyr. AQSH pen Ulybrıtanıada atalǵan toptardy vaksınalaý tájirıbesi bar. Iaǵnı, Pfizer vaksınasynyń tıimdiligin biz is júzinde kórip otyrmyz. Birinshiden, ólim-jitim jaǵdaılary azaıǵan. Jalpy syrqattaný kórsetkishi de kemigen. Bul vaksına 12 jastan asqan balalardyń da, júkti áıelderdiń densaýlyǵyna qaýip tóndirmeıdi. Dúnıejúzilik densaýlyq saqtaý uıymynyń ózi usynyp otyr», - degen maman Qazaqstanda eresek adamdarǵa búginge deıin salynǵan vaksınalardyń tıimdi bolǵanyna toqtaldy.
«Reseılik, qazaqstandyq, qytaılyq vaksınalardyń balalar men júkti áıelder úshin qanshalyqty tıimdi ekeni belgisiz bolǵanymen, qazir qoldaný maqsatyna sáıkestigin kórsetip otyr. Bul jerde mynany túsiný kerek. Bizde buǵan deıin eresekterge salynǵan vaksınalardy balalar men jasóspirimderge salýǵa múldem tyıym salynǵan deýge bolmaıdy. Óıtkeni olar atalmysh eki topqa synaq retinde egilgen joq. «Spýtnık V» qazir osy másele boıynsha synaqtan ótip jatyr. QazVac-ta bul satydan ótedi. Naqty jasóspirimder men júkti áıelderdiń arasynda synaqtan ótkennen keıin ruqsat máselesi sheshiledi. Meniń oıymsha, oǵan sál ýaqyt kerek. Tıisti zertteýler jaqsy nátıje berse, olardy da atalmysh eki topqa qoldanýymyz múmkin. Al ázirge Pfizer vaksınasy ǵana osy eki topqa usynylǵan. Buǵan qarap bizdegi basqa vakınalar COVID-19 indetine Pfizer vaksınasyndaı tıimdi emes degen oı týyndamaýy kerek. Biz qoldanyp júrgen vaksınalardyń bári vırýsqa tıimdi ekenin ýaqyt kórsetti», - dedi Manar Smaǵul.